Home - Utusan Borneo - Berita Iban - Pemansang KDNK suku keempat Malaysia manah: Mohamed Yakcop
Pemansang KDNK suku keempat Malaysia manah: Mohamed Yakcop
Posted on January 14, 2010, Thursday
PUTRAJAYA: Bisi jeritan deka nyukung Malaysia deka madahka pemansang pemansut kasar dalam menua (KDNK) ke positif ungkup suku kempat taun 2009, pia ku Menteri ba Opis Perdana Menteri Tan Sri Nor Mohamed Yakcop.“Positif gaya ni, aku enda ga entu nemu. Tang iya ke nyenggala, pemansang nya positif,” ku iya madah ngagai pemberita udah nyain memorandum pemereti ati entara perintah enggau Oxford Business Group pasal “Laporan: Malaysia 2010” di Putrajaya, kemari.
Iya mega madahka Unit Perambu Ekonomi ke alai iya empu ke diberi tanggungjawab dia, andal ati menua kitai deka bulih lebih ari lima persin pemansang KDNK taun tu.
Perintah melabaka KDNK kusut 3.0 persin taun 2009 udah suku keterubah, kedua enggau ketiga ti ngayanka pemansang ke enda manah, ke alai iya sama-sama 6.2 persin, 3.9 persin enggau 1.2 persin.
Nor Mohamed madahka sekeda tanda manah ke ngayanka KDNK bisi mansang nyengkaum trend ke nyemetak amat ba sektor kilang enggau pemulih korporat ke manah agi.
“Bisi mega tanda kuat ke ngayanka bisi peminta cip elektronik ke nyampau amat empai lama tu tadi asil ari pemansang deras industri kerita di menua China enggau India.
“Kita mega meda peminta barang generasi baru telekomunikasi nyampau amat nambah,” ku iya.
Kelimpah ari nya, Nor madah, pama peminta enggau penanggul bekal timpuh pandak nambah, iya deka ngujungka rega minyak, getah enggau minyak sawit deka niki.
“Ari nya, kitai ke menang sereta bulih penguntung laban kitai ke mayuh mansutka utai nya di dunya tu,” ku iya.
Kerita pesinjir mega majak laku, ngeringka diri ngagai 40,569 ba bulan Sebelas taun 2009 ari 36,254 ba bulan ke sama taun ke dulu ari nya.
Orang minta lun dalam setaun mega bisi nambah ngagai 37.5 persin ba bulan Sepuluh tahun 2009 lalu lun ke pas bisi niki 25 persin.
Baka nya mega, Nor Mohamed madah, ekonomi dipelaba deka gerai jampat agi dalam taun tu.
“Pakej penyungkak ekonomi menua kitai RM67 bilion suba udah ngayanka asil dalam taun tu. Mayuh tanda nyangkung 2010 deka nyadi taun ke manah ke kitai. Nyenggala tak tumu diatu enda ga, tang udah bisi tanda-tanda positif.”
Baik ke nya prestasi sir ke tegap diatu ulih tan, Nor Mohamed madah: Enti nitihka ripot penatai belanja, sir laku diatu tau dikumbai kitai tegap lalu bisi “mood” ke tau amat ngandalka ati.
Makit sir ngayanka orang ti nanam mudal puas ati enggau semua pelin perintah.
“Laban ekonomi domestik kitai bisi tanda manah, sir ke dijual mega mesti bisi ngayanka prestasi ke manah,” ku iya nambah.
Mudal kompeni ke masuk lis ba Bursa Malaysia bulih RM1 trilion kena 5 haribulan Satu tu tadi. Penyampau pengambis mayuh sebedau nya RM1.1 trilion, ke dirikot ba taun 2007 sebedau krisis ekonomi global.
lebuh ditanya sekalika pengawa nyerang gereja bisi meri pangka ngagai mudal ari luar, Nor Mohamed madah: “Kedil agi sida ke nanam mudal nemu kitai tu menua ke beserakup sereta bisi toleransi.
“Aku enda ngasaika utai tu meri mayuh pangka negatif ba timpuh ke panjai,” ku iya. — Bernama
<< Previous Entry - Next Entry >>
