Perintah Sarawak deka terus ngemansangka ladang sawit kena ngangkatka ekonomi rayat
KUCHING: Perintah menua Sarawak enda mudah deka tekuing ati deka ngetuka pengawa ngemansang sereta ngemesaika agi ladang sawit di sereta nengeri tu taja pan bisi bantah ari gerempung ukai perintah (NGO) ari menua Eropah enggau Amerika Syarikat (AS).Menteri Pemansang Tanah, Dato Sri Dr James Jemut Masing madahka Malaysia, kelebih agi menua Sarawak enda mudah arapka propaganda raban NGO ari menua tasiknya ke semina deka muntanka industri dagang minyak sawit Malaysia ba genteran entarabansa.
“Enti nyema kitai alah laban umbok NGO ari Eropah enggau AS tu, dia kitai enda ulih ngemansangka pengidup rayat mayuh di menua tu kelebih agi di menua pesisir.
“Pengawa ti numbuhka ladang sawit di menua Sarawak tu siti ari jalai kena ngemansangka sosio-ekonomi rayat ke diau di menua pesisir,” ku iya madah ngagai Berita Iban ditu kemari.
Masing nyemetak madahka pekara lebuh ke dipinta
meri jaku pasal pekara tu ke bisi diripot ba surat khabar kemari, madahka NGO ari menua dua bengkah nya dipelaba deka terus ‘nyerang’ sereta bejaie ke industri sawit Malaysia sepemanjai taun tu ila lalu bejarit ngagai taun 2011.
Dalam ripot surat khabar ari Bernama kemari, madahkah Chermin Gerempung Minyak Sawit Malaysia (MPOC) Datuk Lee Yeow Chor madahka industri minyak sawit menua deka ‘besemekih’ enggau NGO Eropah, AS sereta orang ke madahka diri sayau sereta ngenan ke pemanah rampa menua dunya.
Nitih ke ripot, ke Lee madahka, sida iya (NGO) ke madah kediri sayau tauka ngenan ke pemanah rampa menua dunya, pengawa perintah ke muka ladang sawit di menua tu ukai semina deka ngemunaska jelu siga ketegal ke ngerumpang kampung tang mega bisi meri pangka ba ubah gaya mua hari dunya, ke nyau majak panas.
Lebuh ke bejaku ngagai Berita Iban ditu, Masing madahka NGO nya semina meda ari perspektif tauka ari sepiak rampa menua aja tang enda ngemataka tauka sengaja enggai mansik ari gaya pemanah industri sawit tu ke ulih ngemansangka pengidup rayat, kelebih agi sida ke diau di menua pesisir.
Masing mega madahka NGO ari menua bukai tu ukai semina deka ngiga jalai kena muntanka industri dagang minyak sawit tang mega deka muka jalai ngagai industri minyak ari kacang soya.
Ku iya, enti dibandingka enggau minyak sawit, minyak kacang soya tu siti ari minyak ke pengabis mayuh diguna orang di menua dua bengkah nya nyadi minyak kena bepanduk tauka minyak empa, nya alai minyak kacang soya tu nyadi ‘munsuh’ ke balat endar besemekih enggau minyak sawit dalam dagang dunya.
Masing madah baru, ba senentang jaku sida ke ngumbai industri tu ngerusakka rampa menua ke ngujungka nadai agi endur utai idup tumbuh sereta jelu siga diau, ku iya, nya siti mega jalai sida NGO deka ngacau dagang minyak sawit.
“Kitai nemu nama utai ti patut dikereja kena ngurangka pengerusak rampa menua ketegal ti muka ladang endur nanam kelapa sawit.
“Kitai ukai nya baru iya ninga jaku ari sida lalu enda ibuh diajar sida, laban kitai lebih agi nemu lalu kitai empu mega bisi atur ke patut dititih kena nangkup pekara enggau pengurangnya,” ku iya madah baru.
Lebuh ke ditanya pasal juluk ati perintah ke deka muka sejuta hektar da agi ladang sawit di menua tu, iya madah pekara nya disadang deka mujur dipejalaika dalam kandang beberapa taun da agi.
“Pengawa muka ladang sawit tu beguna amat kena ngemansangka rayat kitai ba menua pesisir lalu kitai deka terus meri fokus ngagai pengawa ti udah digaga ngelama tu,” ku iya bejaku baru.