KUCHING: DiGi Telecommunications Sdn Bhd (DiGi) ngarapka kompeni nya deka diberi peluang ngerembaika Palan Komuniti Broadband (CBC) sida iya ngagai mayuh agi sitak ba menua pesisir berindik ari palan keterubah ti udah dipejadika ba pelilih menua Lundu kena 28 Januari tu tadi.Ku Ketuai Pegawai Eksekutif DiGi Johan Dennelind madahka enggau peluang ke baru ba Lundu bedau lama tu tadi, sida iya ngarapka mayuh agi peluang deka diberi ulih Perintah Menua ngerembaika (jaringan) teknologi Turbo 3G ngagai menua pesisir.
“Berindik ari pelilih menua Lundu ti baru udah dipejadika iya nya CBC ba Lundu tu tadi, kami ngarapka labur kompeni ba menua tu ngemansangka teknologi Turbo 3G, deka diberi mayuh agi peluang ngerembaika teknologi komunikasi tu ngagai mayuh agi sitak menua pesisir ba menua tu,” ku iya madah maya aum media udah abis bejadika atur pengawa Turbo 3G DiGi Internet Servis, produk keterubah ti diatur ulih DiGi Telecommunications Sdn Bhd (DiGi) ti dipejadi ulih Sapit Kepala Menteri Datuk Patinggi Tan sri Dr George Chan Hong Nam ba pasaraya tHe Spring ditu, kemari.
Ba atur pengawa kemari, DiGi bejadika pengerembai teknologi baru (jaringan) Turbo 3G ba menua Sarawak ke diatur ba Kuching kena ngemenahka agi internet ke bekualiti ba rega ke murah ngagai rayat Malaysia.
Enggau 45 peratus komunikasi Digi ba Kuching maya iya dipejadika, kompeni tu ngarapka sida iya ulih mungkur 55 peratus penyampau orang mayuh ke deka ngena produk komunikasi DiGi sebedau apus bulan March 2010.
Berindik ari Kuching, sida iya mega deka ngerembaika mayuh agi komunikasi DiGi ngagai pelilih menua Miri ba tengan taun tu, ke nitihka pemansang kompeni tu ke deka mungkur mayuh agi komitment labur dalam penyampau RM50 miliun ba serata menua tu dalam kandang tiga taun.
“Enggau servis internet mobile DiGi ti dipejadi ba Sarawak, DiGi diatu nitihka atur kompeni tu mungkur tiga makit besai ba menua tu dalam kandang taun tu.
“Servis internet mobile DiGi diatu udah bisi ba Kelang, Pulau Pinang enggau Kota Kinabalu,” ku iya.
Ku Johan baru, pengguna kemaya hari tu begunaka pengelaju internet enggau rega ke murah, ke dikemansangka ulih servis internet mobile DiGi, ke meri peluang ngagai pengguna ngena servis lalu enda ibuh irau pasal sida iya deka dicaj enggau rega ke mar, ku iya.
“Kami ngarapka udah bisi teknologi komunikasi muden Turbo 3G diatu deka ngangkatka pengguna data ba menua tu.
“Lalu kelimpah ari nya mega, kami ngarapka mayuh agi orang deka ngena DiGi lebuh sida iya ngena servis ‘online’ lalu deka ngerembaika agi pengguna broadband ba serata menua ke mega deka mantu perintah menua mungkur 50 peratus pengguna broadband datai ba ujung taun tu,” ku iya.
Beserimbai enggau atur pengawa bejadika Turbo 3G ba menua tu, DiGi diatu ngangkatka servis internet mobil sida iya enggau rega ke murah ke ulih dibeli ulih orang mayuh, iya nya meli pelin Broadband Explore ke berega RM108 tang udah diberi diskaun ngagai RM88 sebulan nyengkaum diberi HSDPA modem ke ulih dikena pelin tu dalam kandang 12 bulan.
Kelimpah ari nya mega orang mayuh ulih meli pelin DiGi enggau rega RM60 sebulan (promosi rega tu ulih dibeli dalam kandang 12 bulan) sereta pakej tu deka diberi lagu pechuma ti ulih diambi ari DiGi Music Unlimited, enggau meli pelin Internet Unlimited 58 plan kena talipaun binching enggau rega RM58 tang dijual ba rega diskaun RM48 sebulan ke ulih dibeli dalam kandang setaun.
Diatu, servis internet mobile DiGi benung ngadu (roadshow) sida iya ari 5-7 Februari lalu orang mayuh ke deka nemu enggau silik agi pasal produk DiGi tau ngagai pengawa nya ba palan bejual barang The Spring.