KUCHING: Opis Pengangkut Darat (JPJ) deka ngengkahka bala pemesai penerit adat opir tu ti deka ngeluluka diri baka urang priman kena nyaga penglikun ba jalai alun rambau Ops Sikap beserimbai enggau nyambut pengerami Taun Baru China ti deka datai tu.Deretor JPJ Sarawak, Abdul Hamed Akob madahka bala pemesai penerit adat tu deka diengkahka ba sekeda endur sepemanjai jalai alun ba menua tu rambai ops sikap ti belabuh sari tu nyentukka 22 Februari tu ila.
Ku iya, bisi empan iti raban sida deka bejalaika pengawa tu ba ops ti dilanchar beserimbai enggau nyambut tahun baru china ti enda lama agi.
“JPJ udah ngatur empat iti raban penerit adat ti bebaju priman sereta nyaru baka urang mayuh kena nyaga penglikun ba jalai alun rambau pengerami taun baru china tu ila.
“Siti raban tu dipasutka empat iku bala penerit adat lalu sida tu deka diengkah ba sekeda endur sepemanjai jalai ba menua tu rambau tu ila,” ku iya.
Hamed madahka siti raban tu ari Kuching deka nyaru diri baka urang mayuh nyaga pengelikun ba batang jalai ba sekeda endur ba kandang nengeri nya empu.
Ku iya raban ti bukai iya nya ba Sibu, Bintulu enggau Miri.
Iya masutka jaku tu ngagai pengarang berita dikena madahka pengepun Ops Sikap 21 ti dilancharka belabuh sari kemari.
Ops sikap beserimbai enggau nyambut Taun Baru China tu deka dipejalaika nyentuh ngagai 20 Februari tu ila.
Hamed mega nerangka JPJ rambau ops sikap tu terus sigi terus deka ngiri pemereti ati ngagai driba ngambika selalu nyaga penglikun ba jalai alun.
Ku iya, sida ukai deka ngiga penyalah mensia ba jalai alun tang lebih ngemeranka tanggung pengawa ti ngasuh semua driba bebasaka atur lalu beradat.
Sekeda penyalah ti deka diperatika JPJ rambau tu ila iya nya deriba kelalu laju, enda ngena belulang pengelikun enggau selapuk keledar, enda nitihka api tanda jalai, mutung garis besapit enggau mai barang lebih lebih ari ti ditetapka.
Penyalah bukai ti deka diperati rambau tu ila iya nya deriba nadai lisin, nadai cukai jalai tauka udah abis timpuh sereta nadai lisin tauka udah abis timpuh.