Malaysia patut pansut ari sindrom sabsidi

0

Runding muntang, penyakit sabsidi nanggul menua nyapai juluk ati nyadi menua begaji besai

KUALA LUMPUR: Malaysia enda ulih enda pansut ari runding senang ngiga orang gawa enggau penyakit sabsidi enti deka nyapai juluk ati nyadi menua begaji besai, pia ku pegawai kanan Kunsil Penyanding Ekonomi Bansa (MPEN).

TUTU MENSIA: Gaya sebengkah stisin minyak di menua kitai tu ke digambar fotoBernama 4 mac tu tadi. alaysia enda ulih enda pansut ari runding senang ngiga orang gawa enggau penyakit sabsidi enti deka nyapai juluk ati nyadi menua begaji besai, pia ku pegawai kanan Kunsil Penyanding Ekonomi Bansa (MPEN). — Gambar Bernama

TUTU MENSIA: Gaya sebengkah stisin minyak di menua kitai tu ke digambar fotoBernama 4 mac tu tadi. alaysia enda ulih enda pansut ari runding senang ngiga orang gawa enggau penyakit sabsidi enti deka nyapai juluk ati nyadi menua begaji besai, pia ku pegawai kanan Kunsil Penyanding Ekonomi Bansa (MPEN). — Gambar Bernama

“Kitai patut pulai ke pun baru. Kompeni kitai agi bepanggai ba penemu ke muntang ngambi orang gawa gaji mit sereta sabsidi lalu kitai majak ngenauka utai nya. Kitai patut pansunt ari penyakit nya tauka sindorm nya munyi ku jaku Melayu,” pia ku Tan Sri Amirsham Abdul Aziz madah.

Iya nebah penemu munyi nya maya sesi tanya saut ba forum makai lemai pasal Model ekonomi Baru (MEB) ke diatur Jabatan Hal Ehwal Khas (JASA) Opis Menteri Pemadah Komunikasi enggau Adat Asal, empai lama tu tadi.

MEB ke dilancharka Perdana Menteri Malaysia Datuk Seri Najib Tun Razak bulan sigi tu tadi bejuluk ati deka ngubah menua tu nyadi ekonomi begaji besai ke tegut sereta nyerangkung semua ke lalu deka manggaika menua Malaysia ba penuduk ke sigi engkeman nyadi menua mansang datai ba 2020.

“Perintah driba pemansang enggau agih sabsidi ke besai kena meransang ekonomi. Iya tau amat ngasuh defisit majak nambah,” ku iya bejaku ba forum nya. Ketuai Sekiteri Opis menteri, Datuk kamaruddin Siaraf mega bisi datai maya nya.

“Tu ditambah enggau sabsidi minyak, pemakai, nyaga pengerai enggau pelajar ke besai,” ku Amirsham ke dipadu megai pengawa iya kediatu bulan Nam taun siti tu tadi ngambika mantu Malaysia labuh ngagai penusah kusut ekonomi.

“Tiga ngagai empat taun ari tu ila, kitai ulih patut badu nyebut ekonomi begaji besai enti majak ngena jalai ke sama. Nya alai kitai udah netapka pemun iya. Bala kompeni sigi ke patut iya driba pemansang. Perintah semina champur tangan enti bisi krisis besai,” ku iya.

Malaysia enggau naka alah ngintu bajet asil ari tambah pan ke bulih RM67 bilion.

Kos sabsidi ba perintah sama enggau dua ngagai tiga persin Pemansut Kasar Dalam Menua (KDNK) lalu nya ke ngirit ngagai defisit bajet ke nyampau amat ngagai tikas ke pengabis tinggi dalam kandang 20 taun ngagai 7.4 persin KDNK ba 2009.

Nengah bajet 2010, penyampau tagit sabsidi minyak enggau pemakai kusut bulih 4.7 persin ngagai RM20.9 bilion.

Seraya ke meri pemadah ngagai pengari agensi opis menteri, kompeni enggau gerempung ukai perintah maya forum nya, Sekiteri MPEN Prof Norma mansor madahka Malaysia ‘ngamal’ runding sabsidi kelalu lama ngujungka rayat iya dipanjuk “sindrom katak angat” iya nya runding ekonomi ke bepanggai ba sabsidi.

“Nyema pengangat ai majak niki, katak enda ngasaika utai nya laban udah teleba enggau pengasai baka nya. Baka nya mega enggau rayat ke udah kelalu teleba enggau sabsidi. Kitai meri sabsidi ngagai semua mensia nyengkaum pegawai dagang ari menua tasik,” ku iya.

Iya madahka MEB patut bisi kelalin pengelikun sebedau perambu ngerumbak ekonomi ulih dipejalaika.

Jaringan sosial tauka kaul rama amat beguna laban bisi raban ke tusah amat nelebaka diri enggau ubah asil ari perambu baru nya ila maya iya belabuh dipejalaika. Ngambika banding, utai ulih (produktiviti) pengereja pengawa nengah latih ke manah, matih diri baru sereta ngemayuhka pengawa, ku iya.

“Maya ekonomi mansang nyukung rayat ke nadai utai ulih ke menua tu, Malaysia enggai nyadi menua ke bepanggai ba pengasih enggau pengelantang pendiau (kebajikan),” ku Prof Norma.

Bepanggai ba pematut Model Ekonomi Baru, iya madah perambu iya ngira krisis ekonomi Asia 1998 ke ngayanka penuduk Malaysia udah dambi mayuh menua bukai.

Utai tu tasar agi kasak krisis wang global 2007 ke lalu ngerusak eksport menua, ku iya.

Taja pan pelanja mensia mayuh di Malaysia tinggi amai, kira 30 persin ari KDNK, rayat menua tu kelalu mit amat nyadi injin pemansang enggau kuasa meli ke baruh.

“Mudal mensia mayuh meh ke nyukung ekonomi, lalu 40 persin raban begaji mit enda buya ba pengawa ekonomi. Lapan puluh persin ari ekonomi bulih gaji RM3,000 kebaruh sebulan. Nya alai kitai patut ngangkatka ekonomi,” ku Prof Norma.

Kena meransang pemansang, semua mensia patut enggau dalam ekonomi, ku iya. Nengah MEB, rayat Malaysia dipelaba bulih penguntung ari ekonomi ke balat besemekih enggau gaya pendiau ke manah agi.

Prof Norma madahka MPEN diatu benung ngulihka pemadah saut pengawa besai sida nyungkak ubah enggau pemansang nengah lapan bengkah Inistaitif Refromasi Strategik (SRI) ba MEB.

Laban bengkah pengawa tu iya nya ngeregaska baru sektor kompeni, ngemansangka pengereja pengawa bisi kualiti sereta ngurangka bepanggai ba pengereja pengawa orang datai, ngadaka ekonomi menua tu empu ke besemekih, ngeringka sektor perintah, enda bingkuk sereta pemutus penemu mesra makit, ngemansangka infrastruktur bepuguka penemu, nyungkak pun jalai pemansang sereta nentuka pemansang ke rat amat.

Perambu MPEN ungkup MEB enti dipeda sekali inginka 40 persin ari rayat menua tu begaji tauka bisi bulih belanja kurang ari RM1,500 sebulan disungkak nengah mayuh macham polisi ke bejuluk ati ngubah rangkal ekonomi.

Tuju ke penudi iya nyungkak perkapita KDNK ari AS$7,000 ngagai AS$15,000 dalam kandang 10 taun.

Amirsham madahka SRI deka ngelala industri ke meri peluang mujur dalam pengidup dengan pilih industri ke ulih meri rega ke besai ba ekonomi. Ngambika chunto, kompeni ke meri tumpu ngagai inovasi ke deka dipinta nyali dalam pengawa ekonomi.

Iya madahka siti sektor ke ulih meri penguntung ke mayuh iya nya kelapa sawit. Iya madah 60 persin eksport komoditi Malaysia dianjung ke menua China. Kompeni di menua China meli minyak sawit kitai lalu ngaga iya nyadi produk bukai, bulih margin untung 20 persin.

“Tang kompeni Malaysia semina puas ati enggau nyual minyak sawit RM2,500 ngagai RM3,000 setan. Nya alai nuan beguna orang ke landik bedagang dalam sistem,” ku iya.

Datai ba suku ketika, MPEN deka mantaika enggau silik senentang Inisatif Reformasi Startegik nya ke diperambu ngagai perintah.

Amirsham sebedau tu madahka perambu baru nya deka dipasukka entara Atur Malaysia ke-10 enggau Bajet 2011. — Bernama