Home - Utusan Borneo - Berita Iban - ‘Saloi The Movie’ ba wayang 8 Mei
‘Saloi The Movie’ ba wayang 8 Mei
Posted on April 28, 2010, Wednesday
Kompeni ngeluarka filem Iban keterubah tu benung ngelakuka tiket
KUCHING: Filem Iban ti keterbuah ‘Saloi The Movie’ deka berengkah ditayangka ba panggung wayang di menua tu kena 8 Mei tu ila.Berebak enggau nya dia pengeluar filem tu Allen Tinggie Trading Sdn Bhd udah belabuh ngelakuka filem tu ngagai mensia mayuh.
Derikta Eksekutif Saloi The Movie Benny Zach madahka, chara pengelaku filem nya diatu ia nya ngena jalai ti meri perais ngagai pemeli tiket.
Ku iya, pemeli ti meli lima tiket kena meda wayang tu bebeluang bulih perais pakej nemuai ngagai A Famosa Resort, Genting Resorts, komputer riba, kamera video, talipaun binchingBlackberry enggau mayuh utai bukai.
“Mayuh orang ti rindu meda wayang ia nya raban nembiak nya alai sida iya ngelakuka tiket meda wayang tu ngagai palan pelajar tinggi,” ku iya lebuh ti dikerandau pasal filem tu ba Kolej Antarabangsa Teknologi Lanjutan Sarawak (ICATS) kemari.
Benny enggau raban iya benung bejalaika pengawa pemandang kena ngelakuka filem tu ba institusi nya.
Benny madahka udah tu sida deka ngatur pengawa pemandang filem tu ngagai Universiti Malaysia Sarawak (UNIMAS), Universiti Teknologi MARA (UiTM), Kolej Masterskill enggau palan pelajar tinggi ti bukai ba Kuching ditu.
Ku iya, filem nya deka dibantai ke enam kali ba hari keterubah ia nya kena 8 Mei tu ila.
Iya nyangka enda kurang ari 4,000 orang deka meda filem tu ba hari nya ila.
Nitihka rikod, Sarawak ngumpul asil jual tiket wayang RM3.6 milion dalam taun 2009.
Rikod tu mandangka menua tu ngumpul penyampau duit jual tiket wayang ti pemadu baruh bebanding enggau menua bukai.
Menua ti bulih ngumpul duit jual tiket pemadu mayuh iya nya Sabah ti bisi ngembuan penyampau RM11.11 juta ba taun ti sama.
<< Previous Entry - Next Entry >>
