2,000 iku polis deka diengkah nyaga pengawa bepilih mit Parlimen SibuMCIS
KUCHING: Polis Diraja Malaysia deka ngengkahka 2,000 iku raban iya ngambika nyaga pengelikun pengawa bepilih mit Parlimen Sibu ti deka diatur enda lama agi.Kepala Polis Menua Sarawak, Datuk Mohmad Salleh madahka semua raban sida tu udah sedia deka bejalaika tanggung pengawa lalu diatu semina nganti ti deka bekejang ke Sibu.
Ku iya, bala raban sida tu deka dianjung dalam dua renggat.
Renggat keterubah deka bekejang ke Sibu saritu lalu renggat ti kedua deka bekejang kena 3 enggau 4 Mei tu.
“Seraban 2,000 iku bala polis deka dianjung nyaga pengelikun proses pengawa bepilih mit sitak parlimen tu,’ ku iya
Iya madahka, bisi 350 iku ari penyampau nya deka bekejang ke Sibu ba renggat ti keterubah lalu 1,200 deka dianjung sari nangkan ka nya.
Iya bejaku munyi tu ba aum pemberita udah ti nyuaka chek kelim insuran RM33,600 ngagai balu Limbai Joseph iya nya Selai Aji ti udah nadai ketegal sakit.
Bisi datai ba pengerami ti diatur kemari tu nya pengari MCIS Zurich Insurance Berhad M.Jayabarathi.
Mohmad madahka, bala raban polis tu deka bepalan ba tiga bengkah endur iya nya Kem Lanang, Sekolah Latihan Kontinjen (SLK), Jalai Lanang sereta ba Indu Opis Polis Pelilih Sibu.
Iya madahka atur polis sekali tu lain agi enti dibanding enggau pengawa bepilih mit Batang Ai suba.
Ku iya, suba semina bekaul enggau siti sitak Kunsil Nengeri tang sekali tu iya sitak Parlimen ti nyengkaum tiga sitak DUN.
Mohmad madahka, semua bala polis tu endanga sida ditu empu semina CID enggau raban Pampang Mata Gelap deka diambi ari Semenanjung.
Berebak enggau tu, iya madahka ari segi perengka pengangkut sida udah nyedia 350 buah perengka pengangkut baka entuka, perau enggau bilun engkabang.
Mohmad taja pia enggai melabaka dulu endur ti disadang angat maya bepilih tu ila.
Beserimbai enggau tu mega polis deka ngeluarkan permit randau ngagai parti politik ti enggau ba pengawa bepilih tu berengkah ari 8 Mei tu ila.
Pengawa bepilih mit Sitak Parlimen Sibu diatur ketegal pemarai niang Datuk Robert Lau Hoi Chew ti mega Sapit Menteri Pengangkut kena 9 April tu tadi.
Niang Datuk Robert Lau mangku penuduk nya kenyau ari 1990 suba. Komiti Pengawa Bepilih (SPR) udah netapka 8 Mei tu endur ngantung nama lalu hari ngundi ditetapka 16 Mei.