BAU: Kawasan Rukun Tetangga (KRT) ditumbuhka ba genturung pendiau amat beguna kena negutka kaul entara diri sama diri.
Kaban Kunsil Nengeri (ADUN) Bengoh Dr Jerip Susil madahka kemaya hari tu semengat begulai enggau diri sama diri ba genturung pendiau jauh amat udah berubah ke ngujungka mayuh penanggul rama ke nyadi.
“Nembiak rebak baru ke diau ba genturung pendiau ti berimbai rumah diatu nyau nadai semengat begulai enggau diri sama diri.
“Berindik ari pekara nya, nadai penyerakup entara diri sama diri ngujungka penusah rama tau nyadi,” ku iya mansutka penemu lebuh ke bejaku ba pengerami makai malam kena ngintu Hari Gawai 2010 ke diatur Komiti KRT Taman Siniawan ditu kemari.
Jerip mega muji penyerakup Komiti KRT Taman Siniawan ti mayuh agi raban bansa Cina diau ba genturung ke sama besaup ngemujurka pengerami makai malam Harai Gawai lalu nya nunjukka penyerakup rayat menua tu.
Ku iya, semengat penyerakup patut ditanka ngambika semua pupu bansa menua tu ulih diau dalam pengelantang sereta dipajakka rebak nembiak baru jemah ila.
“Pengeramai baka Hari Gawai, Hari Raya, Taun Baru Cina enggau pengerami kebukai ulih diintu begulai tajapan mayuh bengkah pupu bansa.
“Tu endang udah tampak ba rayat kitai menua tu ti amat nunjukka 1Malaysia, lalu penyerakup ti baka nya enda tau enda dipajakka awakka pengelikun enggau pengelantang jemah ila,” ku iya.
Beserimbai enggau pengerami makai malam Hari Gawai mayuh macham pengawa ke dibantaika iya nya main asal bansa Iban, Orang Ulu enggau Bidayuh, tanda gerempung ‘Shin Demo’ Siniawan, tanda poco-poco sereta karaoke.
Bisi sama datai ngulu pengerami nya Chermin Pengatur Morrison Wilfred, Pemesai Opis Penyerakup Bansa enggau Integrasi Nasional Hilman Jack Usli, Tuai Polis Pelilih Bau Cif. Insp Heffyer William Awet, Chermin Rukun Tetangga Taman Siniawan Penghulu Lai Shey Hiong enggau raban kaunselor ke bukai.