Taja pia iya agi mai reti ke sama baka dulu lalu deka mantaika sepuluh iti perais, ku Snowdan Lawan
TU ENTARA LIS AMD: Snowdan (tiga kanan) ngayanka sekeda is perais AMD ngagai komiti DAMA sereta pengarang berita The Borneo Post, Jacob Achoi (tiga kiba) enggau Utusan Borneo, Jacqueline R. David (empat kanan).
KUCHING: Perais pekit Gerempung Artis enggau Pemusik Dayak (DAMA) diatu dikelala enggau nama ‘Anugerah Musik Dayak’ (AMD) lalu iya enda sebaka enggau ngena nama gerempung DAMA agi.
“Iya agi mai reti ke sebaka. Semina perais ba pekit DAMA tu dikelala enggau nama AMD, tang taja pia, gerempung nya agi dikelala enggau nama DAMA semina nama perais nya aja ke bisi ubah mimit, iya nya AMD,” ku chermin DAMA Snowdan Lawan madah maya nemuai enggau bala komiti iya ngagai opis The Borneo Post ditu kemari.
DAMA dijangka deka diatur ba bulan Oktober tu ila.
Entara sekeda perais ke deka diberi malam AMD nya ila, bisi siti anugerah ke pengabis tinggi deka diberi maya AMD nya.
“Nama anugerah nya bedau diberi nama agi tang gelar nya deka diberi ngagai tiga iku orang seni ari raban bansa Dayak iya nya Iban, Bidayuh enggau Orang Ulu.
“Milih orang seni ari tiga iti komuniti tu iya nya siti perais ke pengabis besai gelar lalu iya enda begunaka bepilih ba kategori tu. Tiap iti komuniti ulih nganjung chalun ke bisi ba hati sida iya ke endang mayuh besangkut paut enggau pengawa seni. Penerima tu ila deka dipilih ulih komiti anugerah lalu iya nyangka kaban DAMA tauka ukai.
“Gerempung Dayak baka DBNA, SDNU, SADIA, SDGA enggau sekeda gerempung tauka kelab Dayak bukai (ke udah direjista) tau milih chalun sida iya empu. Tauka, orang seni ke lama udah nadai, kaban belayan diri sebilik mega tau milih sida iya, lalu enti sida iya menang ila, sida iya diri sebilik tau ngambi anugerah nya ngarika sida ke udah nadai,” ku iya.
Sekeda ari perais AMD ti deka diberi malam AMD tu ila, iya nya Best Male (Open-siti perais), Best female (Open-siti perais), Best Dayak Song (Iban/Bidayuh/Orang Ulu-6 iti perais), Best New Artiste (Open-siti perais), Best Album Cover (Iban/Bidayuh/Orang Ulu – 3 iti perais), Best Group/Duo Vocal Performance in a Group (Open category- siti perais), Best Patriotic Song (Iban/Bidayuh/Orang Ulu – 3 iti perais), Best Music Video (Open-siti perais) enggau Best Dayak Album (Iban/Bidayuh/Orang Ulu-3 iti perais).
Snowdan ti mega Kaban Kunsil Nengeri (ADUN) Balai Ringin madah ‘Roadshow’ DAMA ke-2 mega deka diatur kena hari Enam 19 Jun ba Hotel Supreme, ke nangkan keterubah iya diatur ba Sibu bulan April tu tadi, lalu ‘roadshow’ ke-3 deka diatur ba Miri kena 24 Julai tu ila.
Snowdan madah pejalai ‘roadshow’ DAMA sekali tu mai sama sereta bala artis Dayak enda ngira pengawa sida iya nyadi penyanyi, komposer, penulis lirik, peminat, tauka bala orang mayuh ke endang sigi rindu ke musik Dayak.
Pengawa ‘roadshow’ tu mega nyengkaum ngulihka komuniti Dayak tauka ukai Dayak ke rindu ningaka musik Dayak ngambi sida iya nyadi raban DAMA.
“Tu awak DAMA betemu enggau raban artis, penyanyi, pemusik enggau orang mayuh. Nyadi raban DAMA semina mayar RM50 sepala,” ku iya.
Kelimpah ari nya mega, DAMA mega bejadika atur pengawa muka gerempung nya ti deka diatur kena 16 Julai lalu nyangka deka dipejadi ulih siku pemesai.
“Atur pengawa makai lemai nya deka diatur ba palan Christian Ecumienical Centre ba Jalai Stampin lalu gerempung nya mega deka nyual mija ke tau dibeli ulih orang mayuh belabuh ari minggu baru tu ila lalu mija dijual enggau rega RM350, RM550 enggau RM1,000,” ku iya.
Kelimpah ari nya mega, Snowdan madah, pom kena bepilih (nomination form) udah belabuh dikeluarka.
“Kami nesau semua penyanyi, komposer lagu, ngaga lirik lagu Dayak nganjung pom sida iya ngagai kami pengabis laun 31 Julai tu ila. Nya alai kami ngingatka sida iya hari pan nyau makin semak, ngambika sida iya enda laun nganjung pom bepilih tu.
“Tang sebedau nya, sida ke deka nganjung lagu sida iya enggau bepilih tauka sebedau sida iya dikemendar bulih anugerah sida iya enda tau enda nyadi kaban DAMA dulu ke begunka sida iya mayar RM50 siku, laban enti sida iya ukai kaban DAMA sida iya enda ulih nerima anugerah nya laban anugerah nya diberi ulih DAMA, nya alai sida iya enda tau enda nyadi kaban DAMA.
“Diatu lagu ke enggau bepilih nya nadai agi dicaj kami, iya nya penyanyi tau nganjung barang penyampau lagu ngagai pekit tu,” ku iya.
Lagu-lagu ke tau enggau bepilih tu ila enda tau enda ke dirikod lalu udah dikeluarka dalam kandang entara bulan Jun 2008 ngagai bulan Jun 2010.
Pom nyadi kaban DAMA tauka pom kena nganjung lagu enggau bepilih tu ila tau diambi ari opis DAMA empu ba Jalai Stutong Kuching (082-368739), wakil DAMA ba pelilih menua, enti ba Kuching, tau diambi ari lobi Hotel Supreme, Sibu nengah Embat Lala (019-8876053) enggau Wesley Belaja (019-8155332) sereta ba Miri enggau Bintulu nengah Mohd Adaham Abdullah (013-8332608).
Laman web DAMA diatu mega tau dipeda nengah ruai siber iya nya ba www.dama.my. Pom kena enggau bepilih pekit DAMA mega tau diambi ari laman web tu.
“Kami minta sukung semua pupu bansa Dayak nyukung industri tu bai iya ba ‘roadshow’, atur pengawa bejadika gerempung DAMA enggau AMD tu,” ku iya.
Orang mayuh take raban artis enti deka nemu pemadah ke silik agi tau nalipaun ngagai komiti DAMA, Francis Linggie Nyaran (waiFM RTM Kuching 019-8063477), Wilfred Vincent Ragam (019-8181949), Sapit Sekiteri DAMA Isa Lee (013-8266081) enggau Sekiteri DAMA Mervyn Tajem (013-8151453).