MIRI: Bisi 20 iku raban orang ti ngulu Aum Ekodagang Temuai Entarabangsa ti berambaika leka jaku ‘Ngaulka Adat, Rampa Menua Asal enggau Komuniti nengah Ekodagang Temuai ’ ditu ngelawa Universiti Teknologi Curtin kampus Sarawak (Curtin Sarawak).
BEGAMBAR: Raban tu begambar begulai enggau Profesor Joan Gribble sereta Shamsul Anwar (duduk).
Raban tu nyengkaum bala ari Malaysian Technical Cooperation Programme (MTCP) ti ngembuan raban ari menua Bangladesh, Brunei, Kemboja, Indonesia, Iraq, Kazakhstan, Maldives, Morocco, Myanmar, Pakistan, Sri Lanka, Sudan, Syria, Timor-Leste, Yemen, Uzbekistan enggau Vietnam.
Aum entarabangsa ti keterubah iya ba Miri diatur Islamic Tourism Centre (ITC) ba Kuala Lumpur begulai enggau Curtin Sarawak sereta disukung ijensi perintah pelilih menua besai enggau nengeri.
Maya ke ngelawa nya, raban sida tu disambut Sapit kanselor Curtin Sarawak, Profesor Joan Gribble, Menija Pemansang, Bisnes Curtin Consultancy Services (Malaysia) Sdn Bhd, Shamsul Anwar Mohd. Hussein, menija pengawa dagang Curtin Sarawak, Liew Mei Yin enggau menija penyambung Korporat, Nicholas Leong.
Raban tu mega dibai meda ngelingi kampus nya sereta meda perengka guna mayuh ti bisi dia.