KUCHING: Bansa ikan kerapu rimau ke besai endar ke dikumbai orang berikan ba tasik ikan kertang pemerat 231 kilogram (kg) udah mujur ditangkap ba tasik semak Bako di Kuching ditu kemari.
NYAMAI KINI?: Tukay ngempu restoran, Ah Ka Su (kanan) begulai enggau bala orang gawa ba restoran iya begambar enggau ikan kertang ke dibeli iya, kemari.
Ikan kertang ke chukup iya pemesai tu mega udah mujur dibeli tukay ke ngempu restoran Green Hill ba Kuching ditu, enggau rega RM3,800.
Tukay restoran nya, Ah Ka Su, madahka ikan kertang tu meh bansa ikan kerapu ke pengabis iya besai kala dibeli iya, sekumbang ke udah muka restoran nya.
Iya madahka, pengabis besai ikan kertang kala dibeli iya nya pemerat 200 kg, kira bisi enam taun ke udah.
Tang ikan kertang ke pengabis besai sereta berat kala ditangkap orang berikan di menua Kuching ditu iya nya pemerat 270 kg, ke kala ditangkap orang 10 taun suba.
“Ke udah ditemu aku tu meh ikan kertang ke cukup besai kala dibeli aku, tang aku bisi ga kala meda ikan kertang besai mimit ari tu iya nya pemerat 270 kg, 10 taun suba.
“Bansa ikan kertang ke pengabis besai kala dibeli aku dulu ari tu iya nya mina pemerat 168 kg aja,” ku iya madah ngagai Berita Iban ditu kemari.
Ka Su madahka ikan tu nyamai enti dipanduk enggau lada, panduk kari, dalam claypot, panduk tauka kukus enggau lia enggau mayuh chara bukai.
Mensia mayuh ku iya tau datai nguji makai ikan tu ba restoran iya ba Green Hill ditu. Kitai mega tau betalipaun ngagai restoran tu nengah lumor 082-239318.