Presiden Parti Sa’ati Rayat Sarawak (SUPP), Datuk Patinggi Tan Sri Dr George Chan Hong Nam kemari nyangkal penemu ti madahka bala tuai parti tu udah jauh ngejang kediri ari Barisan Nasional (BN).
DR GEORGE CHAN
Dr Chan madahka, tuduh ti baka tu nadai pengamat sereta penemu ti semina deka bejai ke parti ari BN aja.
“Ni bisi, aku ulih nyamin pekara tu endang nadai pengamat,” ku iya.
Ku iya, bala tuai parti tu kiruh bejalaika tanggung pengawa sida kelebih agi nyediaka diri kena napi pengawa bepilih ti deka datai.
Dr Chan mansut jaku tu lebuh ti dipinta ngenang pekara tu kemari.
Apin lama ti udah siti berita ba ruai siber dalam internet ke bisi madahka Parti Pesaka Bumiputera Bersatu Sarawak (PBB) bisi pengirau ati ngagai SUPP.
Kebuah pia, nitih ku ripot nya, bala tuai parti tu dipeda belabuh ngejang kediri ari perintah ti dipegai Kepala Menteri Pehin Sri Abdul Taib Mahmud.
Ku Dr Chan mayuh bala tuai parti tu bejalai ngadu ke tanggung pengawa diri ba menua tu, ukai nya ngejang kediri ninggal ke BN.
Nya alai mayuh sida tu kiruh lalu enda ulih limpang ti ngujungka sida enda ulih ngulu mayuh pengerami ti diatur perintah.
Sida tu semina ulih nyeliah ari pengawa sida nya enti nyema Kepala Menteri deka meda sida ba sebengkah pengerami, ku iya bejaku baru.