SIBU: Nyangka nadai mayuh rebak diatu nemu jerita lama bansa kitai, nyema ke bisi pan tang nadai mayuh.
BESAMPI: Sekeda ari bala temuai ke bisi datai besampi ba Telaga Kumang.
Sekalika jerita lama nya amat tau ke enda kitai sama bela enda nemu laban semina disebut betampung ngena pengingat tauka enggau mulut aja, nadai penerang bukai ngamatka jerita tu baka bup.
Tang orang ba menua Sibu patut berasai temegah ati laban siti palan merindang ati tauka taman ke ngena nama Taman Bukit Aup bisi ngembuan telaga ke endang udah bisi dia ari kelia menya.
Telaga nya dikumbai Telaga Kumang. Nitihka pansik Berita Iban apin lama tu tadi, mayuh sida nyebut telaga nya endang sigi bisi dia kenyau ari menya sereta ngembuan cherita kediri empu. Tang nyangka cherita siku-siku enda sebaka.
Enti nitihka ari segi geografi telaga tauka anak sungai jarang tauka nadai kala dipeda ba mungu, tengan bukit baka ba Bukit Aup nya.
Nitih ke cherita lama rayat ba menua tu, dulu kelia telaga tu alai sida Kumang mandi.
Kumang dipadahka ari menua iya, Gelung nurun ngagai menua anak mensia mandi ba telaga nya iya ke dijaga siku naga ke benama Naga Bari.
Ku jerita, sebedau mandi dia Kumang minta pemendar dulu ari Naga Bari.
Kumang ke mandi dia ukai sekali dua tang bangat suah ngujungka Naga Bari nyau mindah ngagai tunchung Bukit Aup lalu udah nya nyaga Sungai Igan baka ke bisi dipeda nyentuka diatu.
Nya alai telaga nya dikelala enggau nama Telaga Kumang nyentuka sari tu.
Maya Kumang ke mandi dia kenu ko cherita, bau angi nyau beali-ali. Penyelai nya bisi nyadi nyentuka sari tu, tang bepangai enggau pemidik, pengelansik siku-siku.
Sapa ke betuah aja ulih nyium bau angi ba telaga nya maya bulan kembung.
Pekara tu mandangka telaga nya endang agi berantu.
Taja pan pia pekara nya enda ngenakutka bala temuai ke bisi datai ngagai palan nya laban sida pechaya cherita nya cherita lama sida ketuai-tuai dulu kelia.
Dungan Melamun, siku temuai ke bisi datai maya nya, madah ba Sarawak bisi dua iti Telaga Kumang.
“Aku nemu ari cherita orang tuai kelia madahka menua tu bisi dua iti da agi Telaga Kumang kelimpah ari ba Bukit Aup tu.
“Siti nya ba Tuchung Bukit Tiang Laju, Ulu Kumpang ba pelilih menua Lubok Antu enggau siti agi ba Bukit Tibang, Batang Rajang, Kapit,” ku iya madah ngagai Berita Iban.
Taja pan baka nya ku iya, dua bengkah telaga tu mar amat dilawa enti enda dibai mimpi laban mayuh amat penanggul ke ulih nabanka nyawa maya bejalai ngelawa telaga nya.
Nya alai ku iya, bisi ke enda telaga nya, kitai enda nemu laban nadai siku ulih madah pengamat jerita nya.
Semina siti ajaTelaga Kumang ke ulih dilawa iya nya ba Bukit Aup, Sibu.
Labang Juman, siku temuai ke sama bela datai nemuai ngagai Telaga Kumang maya nya, madah iya endang pechaya telaga nya endang bisi nitihka jerita lama kitai bansa Iban.
“Aku selalu datai kitu besampi minta pengerai, berkat ari Kumang. Aku ulih ngasaika pengamat pekara nya,” ku iya madah ngagai Berita Iban maya betemu ba telaga nya.
Maya nya mega iya becherita, dulu menya suba ba tuchung Bukit Aup, bisi sebuah rumah panjai ke diwan orang Pangau Libau.
Labang madah, mayuh bansa Iban ari serata menua tu datai ngelawa Telaga Kumang laban pechaya palan nya tau endur beniat, besampi minta pengerai.
Ku iya, enti empungas (besampi) enggau ai telaga nya tau ulih ngubat nama bansa igi penyakit, muai sial sereta ulih ngamatka peminta bala ke datai beniat ba dia.
Ari nya ku iya, mayuh bansa Iban ke bukai ari menua jauh sanggup datai ngelawa palan nya, beniat, miring lalu bisi ari sida nya datai malas niat sida laban kenu ku peminta sida dikamatka Kumang.
Nya alai enda tau enda ngaga pengawa malas niat nya nangika penusah bukai nyadi.
Siku agi temuai ke bisi datai maya nya, ke semina deka dikelala enggau nama Jeffses madah telaga nya patut dijaga enggau manah sida ke bekaul ngambika ulih dipeda nembiak dudi ari.
“Telaga tu ukai endur beniat aja tang nyadi siti palan ke ulih narit temuai ari menua luar datai sereta mai penguntung ngagai penatai pemisi menua tu,” pia ku iya.
Ku iya pengawa nyaga pengelikun palan nya patut digaga enggau badas agi laban mai besai reti ngagai bansa Iban menua tu.