Anang enda ngadang enggau orang ke minta sedekah

0

SIBU: Mensia mayuh ba menua tu dilalau bejaga-jaga lebuh meri duit ngagai bala orang ke minta sedekah ba sebelah tisi jalai tauka pengemis laban sekeda ari sida nya semina belakun aja.

BELAKUN: Raban pulis nanya penerang ari Luo pengudah iya dipadahka semina belakun timpang pendiau minta duit ari orang mayuh.

BELAKUN: Raban pulis nanya penerang ari Luo pengudah iya dipadahka semina belakun timpang pendiau minta duit ari orang mayuh.

Siku ari sida tu datai ari menua China ti ngena pasport entara bansa tama ngagai menua tu lalu minta sedekah.

Nitihka dipadah, iya sanggup ngena mayuh chara dikena ngambi ati orang bukai meri duit ngagai iya.

Ku siku orang ke bisi meda iya, orang tu (pengemis) suah minta duit ngagai orang mayuh ngena papan ke digaga ngena tayar.

Iya ke minta duit nya tadi dipadahka berasur ngena papan nya minta duit sebelah supermarket, kedai kupi enggau ba makit besai tauka Pasar Sentral Sibu ditu.

Orang mayuh ke udah meda iya madah, iya tu semina ulih dipeda maya jam ke enda disadang aja.

“Udah sekali aku meri iya duit ketegal sinu meda iya bejalai berasur ngena papan ke bisi tayar maya aku ngulu pengerami Mantaika Main Asal Borneo (BCF) apin lama tu tadi,” pia siku ari orang mayuh madah ke enggai disebut nama.

Tang ku iya, iya berasai tekenyit amat lebuh meda apai tuai nya ulih bejalai baka orang bukai ba sebelah lurong mit sereta sepiak jari megai papan kena iya berasur lalu sepiak miching baldi ke alai iya nepu duit dipinta ari orang mayuh.

Siku agi saksi madah, lebuh siang hari iya meda apai tuai nya nerasur minta duit lalu malam iya meda apai tuai nya tadi bejalai meli barang ba pasar malam ditu.

“Aku mega bisi meda orang baka tu ba pasar Miri bulan nyin suba,” ku iya sambil madah iya enda nemu sida tu datai ari menua China tauka ari menau bukaui.

Orang mayuh ke bisi meda apai tuai nya balat sinu meda pendiau iya ngujungka sekeda ari sida ke bedaja dia nanya penatai iya.

Keterubah iya, apai tuai nya ngaga diri enda nemu bejaku, semina bejaku ngena jari aja tang pengudah iya nyau digulu orang mayuh nyangka nyau takut lalu madah iya kediri datai ari menua China sereta bisi ngembuan pasport entara bansa tama ngagai menua tu nyadi temuai (pelancong) ke ditatak ulih tama menua tu dalam pengelama 30 hari.

Balat ngasuh orang mayuh iran, bakani iya ulih datai kitu ketegal timpang pendiau ke semina ulih beresur ngena papan ke bisi tayar ulih nepan bilun.

Iya madah, iya dibai siku kaban iya lalu madah duit iya udah ambis nya alai iya belakun minta duit kena ngiga belanja.

Maya dipinta mantaika pasport iya mantaika dukumennya ke madah iya ti benama Luo Lai Xing, 46 taun udah datai ba menua tu kenyau ari 13 Julai tu tadi lalu timpuh ambis taun 2019 ila.

Bala pulis enggau pemesai ari Majlis Pebandaran Sibu datai dia sereta mai Luo ngagai langkau polis ke besemak dia pengudah nerima ripot ari orang mayuh.

Taja pan baka nya nitihka penerang Luo dilepaska baru laban iya enda ngereja sebarang pengawa salah tang semina minta sedekah aja.