KUCHING: Komiti Pengawa Bepilih (SPR) Sarawak madahka opis pengawa bepilih tu diatu benung dituntung penanggul suntuk pom kena ngerejista pengundi.
Kepala SPR Menua, Datu Takun Sunggah enda bebulaka berita ti madahka opis tu diatu benung dituntung penusah suntuk pom ngerejista pengundi.
Takun taja pia enda madahka maya penusah ti berengkah ari minggu nya kemaru tu ulih diputar.
“Nyangka ba minggu siti nyin ila baru pom tu bisi,’ ku ti lalu madahka sida diatu benung nganti pom nya ti dikirum ari Kuala Lumpur.
Iya mansutka jaku tu lebuh ti dipinta ngenang sebana Parti Keadilan Rakyat (PKR) ti madahka opis pengawa bepilih tu nadai agi pom kena minta ngerejista nyadi pengundi.
Chermin PKR Sarawak, Baru Bian mantaika penanggul tu ba aum pemberita ditu kemari.
Ku Baru, bala raban iya ti deka bejalai ngerejista nama pengundi diatu nyau puntan ketegal pom nya.
“Nadai agi pom, lebuh ti ditanya dia bala pengereja pengawa dia madahka udah abis,” ku baru lebuh ti mansutka penanggul tu.
Nitih ku Baru, penanggul nadai pom tu nuntung opis pengawa bepilih nya kenyau ari minggu siti nyin kemari.
Berebak enggau tu dia Baru ngarapka SPR nyelak mayuh agi pom tu ngambika enda muntan pengawa ti deka ngerejista pengundi ba menua tu.