Perambu numbuhka komiti megai PTMS ngambika ulih napi penanggul raban ke enda bidik ari menua jauh
KUCHING: Pendam Temuai Munggu Sabun (PTMS) ba Jalai Pending ke sigi udah lama endur numbakka orang ke parai sekumbang ke dipegai perintah koloni British kelia agi mengkang ba endur nya lalu nadai dipindah ngagai endur bukai.
MINTA PENGERAI: Baru udah abis miring. Sama bisi dipeda ba gambar, James (enam kanan), enggau bekau chair-person MAIS Dato Sri Tra Zehnder (tujuh kanan).
Penyanding Penemu komiti pendam nya Temenggong James Jimbun madahka komuniti ke bempu kaban belayan ke ditumbak ba pendam nya udah madahka penemu sida iya enda mindah ngagai endur bukai tang agi mengkang ba endur nya.
“Sida ke bempu kaban belayan ditu udah mutuska penemu enda deka mindahka sebayan sida ngagai endur bukai lalu mengkang nguan pendam nya.
“Nya hak sida iya taja pan bisi munyi sekeda orang ke deka ngemansangka endur nya ngasuh sida iya mindah ke bukai,” ku iya madah maya ditemu ba atur pengawa miring melasi menua ba tanah pendam nya empu, kemari.
Penemu tu dibantai laban berindik ari penyarut ke bisi nyadi lebuh bisi gerembung kunsi ke deka ngemansangka tanah pendam nya pun taun tu tadi ke deka digaga sekeda bagi ari tanah pendam nyadi palan engkah kerita.
“Berindik ari nya, gerempung kunsi tu lalu terus ngereja tanah pendam nya nadai minta pemendar ari opis kunsil enggau kaban belayan ke beempuka sebayan ke bisi ditumbak dia lalu nyangkul sebelah nya dia, dikelitika sida.
“Tang pengawa tu ditemu sekeda bala kitai lalu ngeripot pekara nya ngagai aku.
“Aku bisi ngasuh sida ngeripot ngagai polis dulu, lalu nulis surat ngagai kami ba Opis kunsil penyimpan enggau Penusun Adat Menua (MAIS) mansik pekara nya ngagai Opis Tanah enggau Survei (JTS).
“Pemutus iya udah nya opis JTS madahka tanah nya dikuasa Opis Kunsil Bandaraya Kuching Selatan (MBKS) Lot 2020 Kuching Land District (KLD) ke diungkupka ngagai pendam, nya ke dikumbai kami Pendam Temuai,” ku iya.
Lebuh kami mansang betemu enggau pemaju projek ke deka ngemansangka tanah pendam nya, sida iya madahka sida iya udah diberi pemendar ari ‘orang atas’, taja pan sida iya nadai ngembuan sebarang pelin pengawa injinia sebedau dikemendarka.
“Nya alai opis kunsil enda tentu nemu pekara tu laban sida (orang ke ngaga projek) dulu ngerumpang, tang taja pia, sida iya ngaku nya penyalah sida ke udah nujah pendam lama.
“Nya alai sida iya besetuju deka mayar ungkus pagi tu kena melasi menua ke beungkus urung RM2,500 nitihka adat istiadat,” ku iya.
Ku James pendam nya kelia, keterubah iya dibuka urung taun 1930 maya perintah Koloni kelia, sigi endur numbak temuai ke datai ari jauh (ukai orang ari nengeri tu empu) tauka tegal parai nadai kaban belayan tauka nadai tubuh ditumbak ba pendam tu.
“Pendam tu udah dia nyangka bisi dalam urung 100 taun, keterubah iya dibuka maya perintah Rajah kelia.
“Tang sapa ke ditumbak ditu enda ditemu laban kaban belayan sida ke agi idup, diatu bisi sekeda enda nemu bagi pendam kaban belayan sida iya. Ba opis pengerai, Kunsil MBKS enggau Residen sama nadai nyimpan rikod sida ke ditumbak ditu,” ku iya.
Pengawa melasi menuatu nyauka sebaka enggau kitai ke minta ampun ketegal udah saru tekelanjur kaki jari, tauka ngatur pengawa meresi endur nya ngambika ulih nyeliahka pekara ke enda manah ngeruga mensia ke agi idup.
“Adat Melasi Menua endang dikembuan kitai Iban ke lebih agi kitai ke nguan rumah panjai tang baka kitai ba mengeri tu, patut mega dikembuan adat nya laban kitai tu agi bansa Iban, enggai nyadi enda diintu kitai. Ba bansa bukai nyangka nyelai peda orang tang ba bansa kitai endang peturun aki ini kitai suba ngereja tu, nadai kebuah kitai enda ngintu nya (adat),” ku iya.
Bisi penemu baru diatu, ku Temenggong James deka ngaduka pendam nya manah ke agi, nya alai kebuah MAIS udah minta tanah kena ngaga tanah pendam ke lebih agi ungkup bansa Bumiputera baka raban bansa Dayak (Iban, Bidayuh, Orang Ulu) ke diau ba mengeri (Kuching).
“Baka ke diatu, urung 70,000 bansa Iban diau di Kuching, ukai semua sida ke ditu orang Kuching, bisi mega datai ari sitak menua jauh.
“Enti sema sida ke berubat ari menua jauh, sakit bendar lalu nadai ba sepital, ungkus kena mai niang sida iya pulai ke menua tentu mar. Enti bisi palan ke baka nya, ulih mega sida nganjung niang sida ba pendam nya.
“Kitai ke diau ba mengeri diatu tubuh nyau majak mayuh. Enti nadai perambu tauka pelin ke manah dudi hari ila, kitai deka dituntung penusah.
“Enti maya udah deka parai ukai ulih tagang, utai ke baka tu meh nyadi penanggul ba kitai.
“Nya utai ke dipinta aku ari perintah lalu minta kitai Dayak sama nyukung peminta nya,” ku Temenggong Jimbun.
Sebedau nya chairman komiti PTMS, Albert Bejie madahka komiti nya merambu deka numbuhka Komiti Penyimpan Pesaka (Board of Trustees) megai tanah tu lalu ukai diserah ngagai MBKS.
“Komiti tu tau dipasuk sebarang raban bansa.
“Tang laban kitai belandikka mayuh sida ke ditumbak ba pendam tu ari kitai ke bansa Iban, nya alai, perambu kami ngambika tebal agi raban ba komiti tu ari raban bansa Iban,” ku iya seraya ti madahka surat pala tanah nya udah diserahka ba taun 1973 suba tang udah lama endur bansa Iban numbak kaban belayan sida ke nadai kenyau ari taun 1933 kelia.
Albert mega ngarapka perintah deka berunding meri kuasa tanah nya dipegai ulih komiti nya jemah ila lalu ukai ba baruh opis kunsil MBKS.