Site Last Updated 2:50 pm, Saturday

Penusah kes bot express karam ngenyinuka ati

Posted on October 20, 2010, Wednesday


Naka kemari, raban polis udah tetemuka enam bangkai mensia ba penusah ke bisi nyadi nya

BINTULU: Penusah kes belantak bot express enggau tungkang meri penyinu ngagai orang mayuh kelebih agi ba bala ruang bilik ke bisi dituntung penusah.

ENDA DISADANG NYADI: Bangkai niang Lily anak Manggie dibai ngagai Sepital Besai Bintulu ngambika dipansik enggau silik.

Teresa Patrick, 50 bini niang Wilfred Ukir anak Salleh,56 madahka, sida iya nemu penusah bot express ke belantak tu ari bala raban Opis Tanah enggau Penyukat (JTS).

“Laki aku gawa ba Opis Tanah enggau Penyukat tang dipinjau gawa enggau kompeni Grand Perfect ba Kem Gabong, Sungai Kakus Tatau.

“Kami sebilik nemu penusah tu nyadi bekau ke dipadahka nengah telefon ari Opis JTS ti madahka bot express ditepan laki aku dituntung

kes belantak enggau tungkang,”pia Ku Teresa madah ngagai raban pengarang berita lebuh ditanya ba palan Sepital Bintulu maya ke nganti bangkai niang laki iya tembu dipansik bala raban sepital Bintulu.

Niang Wilfed dipadahka, asal ari RPI (Rumah Panjai Iban) Rumah Sudan, Ulu Sungai Naman ke bisi 6 iku anak lalu gawa nyadi Juruukur ba Opis JTS.

Noria Lina,14 siku ari anak niang Wilfred madahka, maya ke penundi iya betemu enggau apai iya urung pagi hari sebedau iya nurun ke sekula lemai nya.

“Sebedau ngalih hari apai aku nurun bekejang ke pasar Tatau laban deka nepan express nya,”pia ku Noria ti agi mekang besekula ba SMK Bintulu.

Bangkai niang Wildfed deka dibai pulai ke sibu ngambika disenggai.

Pia mega, Wong Seng Guan asal ari Durin,Sibu mega entara raban ke sama parai ba penusah nya.

Foreman GP Plantation,Lau Ling Hoe,43 madahka, iya bekereja begulai

enggau Wong ba Kem Gabong ti gawa enggau Kompeni GP Plantation lalu Wong kereja nyadi mekanik ba kompeni nya.

“Maya penusah tu nyadi, Wong baru mulaika diri ari Durin lalu deka nurun kereja ngagai Kakus, Tatau baru pengudah abis kemisi.

“Aku cukup sinu ngenang niang udah nadai kena penusah ti enda disadang ke lebih agi iya entara raban pengereja pengawa ke manah sereta bagas gawa,” pia ku Lau mantaika penyinu iya ngagai raban pengarang kemari.

Lalu, entara bangkai anak mit ke dulu ditemu iya nya Jennifer Yak,10 bulan ke ditemu melepu enda jauh ari palan penusah tu nyadi ensanus.

Ina anak Labin, 23 madahka, anak mit nya anak petunggal iya ke sama bela nepan bot express nya.

“Petunggal aku nya, Undah anak Engkamat beumur 23 taun begulai enggau anak iya nepan Express laban deka pulai ke Kem Gabong nitihka laki iya ke gawa nyadi mekanik enggau kompeni KTS.

“Kami diatu agi nganti berita bekaul enggau petunggal aku nya ti bedau ditemu nyentuk ke diatu,” pia ku Ina ti madahka Undah anak Engkamat asal ari RPI RH. Santok, Selanggau.

Kelimpah ari nya, niang Lily ak Manggie,38 sereta Lenny ak Ibin,9 ari RPI Rh Pandung, Nanga Kakus mega entara orang ke kena penusah bebadi kes belantak tu.

Jeluwie, 22 anak niang Lily madahka, iya balat sinu ati laban indai enggau menyadi iya sama bela bisi nepan ba bot express tu.

“Apai aku gawa enggau kompeni KTS ba Kem Gabong nyadi mekanik lalu indai sereta menyadi aku deka pulai ngagai kem palan apai aku gawa bekau ke pulai nemuai ngabas kami menyadi,” pia ku Jeluwei ti madahka sida menyadi bisi tiga iku.

Bangkai niang Lily ditemu melepu ulih raban Polis urung jam 2.20 lemai bekau ke tetemuka bangkai Bremas anak Nyuin urung pukul 1.30 lemai kemari.

Nitihka penerang, ke diatu raban Polis udah mujur ditetemuka enam iku bangkai iya nya Jennifer Yak, Wong Seng Guan, Wilfred Ukir anak Salleh, Miyas anak Renggan, Bremas anak Nyuin enggau Lily anak Manggie ti parai ketegal penusah bot Express enggau Tongkang ke belantak ba Sungai Kakus, Tatau ensanus.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.

90