Udah 12 taun nganti lalu enda mujur, minta raban ke bekuasa mantu mutarka penanggul nya
SIBU: Siku nembiak lelaki ke beumur 21 taun berasai irau amat taja pan udah suah niki Opis Pengerijister Bansa (JPN) deka ngaga kad pengelala (MyKad) tang pengawa nya enda kala mujur.
Ramsay ari Batu 8 1/2 Jalai Durin Link, Sungai Sengan, ditu madah, indai iya udah kala ngaga surat pengada ke iya ba taun 1998 suba ba Opis Pengerijister Bansa (JPN) tang enda mujur.
“Indai udah ngelawa JPN ngaga surat pengada aku maya nya (1998) ba baruh genteran Ngerijister Laun (pendaftaran kelewatan) laban maya deka ngaga suba pengudah aku ada, bisi penanggul nuntung kami sebilik maya nya,” pia ku iya madah ngagai Berita Iban ba opis Utusan Borneo ditu, kemari.
Ku iya, taja pan laun ngerijister pengada ba JPN enda patut nyentukka diatu enda ulih digaga.
Meda baka nya, Ramsay madah, indai iya, Limoi Brendam nguji sekali agi ngemutarka penanggul nya lalu kena 13 Julai taun tu, indai iya nandu baru pengawa ngaga surat pengada laban beguna dikena ngaga tingki iya.
“Tang lalu apin ga penanggul tu diputarka,” pia ku iya nerangka.
Ramsey mega madahka, sebedau nya indai iya bisi minta bantu ari siku YB menua tu ba taun 2007 suba tang semina ulih ngaga surat pengada aja nya pan enda nyemetak (lengkap) ngujungka meri penanggul ngaga tingki.
“Diatu umur aku manggai 21 taun, tau ngerijister nyadi pengundi, tang bakani deh…?, aku nadai ngembuan tingki,” pia ku iya madahka baru.
Ramsay madah ba menua iya din pan mayuh orang ke nadai tingki enggau surat pengada, nya alai ku iya, enda patut nadai sida ke bekaul enggau pekara ngemujurka penanggul tu baka Tuai Rumah, Penghulu tauka bala kaunselor sereta orang ke bekuasa.
“Aku ukai bejai sapa-sapa, agi mayuh orang bukai apin ngembuan tingki tauka surat pengada ke lebih agi sida ke diau di menua pesisir.
“Nyangka ukai semua orang dituntung penanggul ke baka tu tang dipelabaka aku mayuh orang bukai ke diau di ulu ai din napi pemar begagaka surat peranak tauka kad pengelala,” pia ku iya.
Ramsey ti bejaku ngarika sekeda raban ke sama dituntung penanggul baka iya, ngarapka sida ke bekuasa tauka ti beempuka tanggung pengawa ulih ngemutarka penusah nengah nama-nama chara ke patut.
“Diatu mar amat aku ngiga pengawa laban enti nadai tingki baka ni deh? Nadai pengawa, indah enda sebaka enggau dapur ke enda ditanggarka enggau periuk asi,” ku Ramsey sebana.
Iya ti gawa nyaga pengelikun (security guard) ba sebuah kompeni ditu madahka, iya semina besekula naka pom lima aja tang udah nya enda nemu chara nyambung ketegal ke nadai MyKad.
“Benasit amat ulih sekula naka pom Lima, ulih ngambi peresa ngena surat pengada ke enda nyemetak nya tang maya begigaka pengawa nya ke tusah,” pia ku iya madah.
“Berindik ari penanggul ke baka nya, ukai semina enggi aku aja, aku arap bendarka sida ke bekuasa serteta ti megai tanggung pengawa berundingka jalai ti manah sereta patut mutarka enggau jampat nasit kami ke ‘semina dipeda idup tang enda ulih enseput’,” ku iya.