Penusah pengidup siku indai tunggal dibantu

0

Ditengkebang raban SUPP kena mantu Lenny ke merinsa nupi lima iku anak iya

MANTAIKA PENYINU SIDA: Raban penemuai SUPP pampang Bintulu ti betuai Chairman iya, Henry Ling (enam kanan)betemu Lenny di Bintulu.

BINTULU: Enti dipeda enggau sema baru kitai nemu siku indai tunggal beranak lima ngasaika pemerinsa iya laban ngenang nasit ke ditapi iya ketegal ke udah ditinggal laki (udah parai) taun nyin kemari. Iya ti diau ba rumah panjai Rumah Mujah ba Batu 12 Jalai Bintulu-Miri.

Lenny Bakut, 29 ke udah mati laki (Joshidi Joe Sylvester Lajo) kena 29 September 2009 diatu betapi enggau penusah pengidup begulai enggau empat iku anak iya ke agi besekula sereta siku anak mit berumur tiga taun.

Lenny endang begunaka bantu kena nupi anak iya ke agi sekula sereta siku anak mit.

Antara anak ke begulai enggau iya, iya nya Christopher Sujang, 12, Tahun Enam; Christie Prisce Alissa, 9, Tahun Tiga; dua iku besapit Frankie Paul, 7, enggau Frankie Patrick, 7, Tahun Satu sereta Alister Kelvin, 3.

Penusah pengidup siku indai tunggal begulai enggau lima iku anak iya udah ditemu rita ari kaban komiti Parti Sa’ati Rayat Sarawak (SUPP) pampang Bintulu ti bisi nemuai ngagai rumah panjai iya ba Jalai Bintulu-Miri, apin lama tu tadi.

Raban Indu SUPP pampang Bintulu madahka deka meri bantu ngagai Lenny ngambika ulih ngelempungka agi penusah iya sereta ngangkatka pendiau pengidup ari dituntung gaya idup ti seranta.

Tuai Raban Indu nya, Christina Tan Ah Lan bejaku, “Aku minta semua raban SUPP ulih bekunsi penusah enggau siku indai tunggal tu lalu gerah jari meri bantu duit ringgit ngagai iya (Lenny),” ku iya.

Beserebak enggau nya Pengerusi SUPP pampang Bintulu Henry Ling Kuong Meng madahka, “ari penerang ba ruai siber ‘Facebook’ enggau `Sarawak Update’ ke bisi diayanka, aku andal ati bisi pemujur ba Lenny”.

Tang amat meh baka nya, aku meri besai terima kasih ngagai sida ke gerah jari mantu iya, ku Henry.

“Enti kitai meda, iya chukup merinsa nupi lima iku anak ti semina ngarapka bantu ari mensia mayuh.

“Iya ngemansangka pengidup diri ngena chara gaga perengka ari pengelandik jari kena nupi bala anak iya,” ku iya.

Henry madahka baru, enti sema mensia mayuh deka mantu tau meri bantu ngagai lumur akaun, iya nya Lenny Anak Bakut ba Agro Bank (Bank Pertanian Malaysia Berhad) ba lumur: 2-00-1801-00017315-0 (AGROTANI).

“Bagi pemeri bantu ari SUPP, kita tau nanya tauka betemu enggau Christina Tan Ah Lan ba penerang ke silik,” ku iya bejaku nambahka baru.