SIBU: Tanggung pengawa nyadi tuai raban bansa kemaya hari tu majak tusah agi laban sekeda bala ba menua tu nyadika pengawa nya siti ari perengka politik kelebih agi maya pengawa bepilih.
Menteri Pengatur Pemansang enggau Pengeraja Asal II, Datuk Amar Awang Tengah Ali Hassan (gambar) madah, tuai raban bansa ba menua tu udah bisi dikena sebengkah parti ti ngira penguntung sida aja taja pan batang pengawa nya enda ulih dibai dalam politik.
“Aku ngarapka tuai raban bansa enda geruga ati enggau main politik sida, tu laban enti nyema alah kena pujuk rayat, menua tu deka dituntung pengerugi.
“Rayat agi ngarapka pemansang baka sekula, jalai alun, ai beresi, karan enggau mayuh agi ke bukai,” pia ku iya madah.
Iya madah munyi nya maya meri jaku pengelalu ba Seminar Pemansang enggau Tuai Raban Bansa Nengeri Sarawak 2010 sitak Sibu, kemari.
Pengawa nya digulu urung 800 iku tuai bansa sereta dipejadika Kepala Menteri Pehin Sri Dr Abdul Taib Mahmud, kemari.
Awang Tengah mega madah iya andal ati, tuai raban bansa ulih meda tanggung pengawa sida enggau silik agi laban kemaya hari tu sida ukai semina nyaga pengelikun nembiak ke dipegai ba baruh sida aja.
“Tuai raban bansa patut ngembuan runding ke progersif kelimpah ari belalauka ‘action oriented’ sereta nyadi ke diri jematan rayat enggau perintah ba pengawa mantaika penanggul tauka peminta rayat.
“Enti sida ulih ngembuan ulah baka nya, menua tu deka likun ari penusah rama enggau pengawa pemansang,” ku iya sambil madah tuai raban bansa mega meseti ngerekai ke ulah deka nemu pemansang menua Sarawak ba bala nembiak.
Iya ti mega nyadi Menteri Perengka Guna Mayuh madah, ba pengawa napi penguji nyadi tuai bansa, sida mega patut ngembuan ubah ba ulah diri kena nyerumba pemansang menua ngambika enda tinggal jamah orang bukai.
Ku iya, sida patut berubah dulu dikena ngeringka pegai sida ngagai rayat kelebih agi ti diau ba menua pesisir enggau rumah panjai.
“Nya alai, pengelandik sida enda ulih enda diangkatka laban nengah chara tu sida deka nemu agi bejalaika tanggung pengawa kelimpah ari bejalaika adat ba menua diri,’ pia ku iya nerangka.
“Tuai raban bansa ke bepenemu ulih mantu perintah ba pengawa ngangkatka tikas pengidup rayat ari segi runding enggau pemansang ke bukai,” pia ku iya.