Atlet OKU seruran diberi kelai: Mawan

0

Ketegal mujur ngangkatka nama Sarawak enggau Malaysia ba pekit paralimpiad

KUCHING: Perintah menua Sarawak begulai enggau Opis Menteri Pemansang Rama enggau Kandang Nengeri seruran meri basa tauka kelai ngagai raban atlet nyelai pendiau (OKU) ti udah mujur ngangkatka nama Sarawak ba pengawa lumba enggau main.

Menteri Pemansang Rama enggau Kandang Nengeri Dato Sri William Mawan Ikom mansutka jaku tu ba pengerami nyuaka insentif ngagai raban atlet OKU ti udah mujur bulih midul maya Pekit Paralimpiad Malaysia ke-15 Melaka 2010 ba siti hotel ditu malam kemari.

“Perintah seruran nyukung raban tu (atlet OKU) lalu aku andal ati kita ulih ngangkatka agi tikas pemujur berengkah ari renggat menua, Malaysia enggau dunya.” ku iya.

Kena meri basa ngagai raban ti udah mujur ba pengawa sida iya, perintah menua nengah Opis Pengintu Pengelantang Mensia Mayuh (JKM) udah ngeluarka duit RM463,000 kena bejalaika pengawa lumba enggau main nya lalu ari penyampau nya RM168, 700 dikena mayar insentif ngagai atlet ti udah mujur teulihka midul.

Iya madahka siti midul emas deka diberi insentif RM1000, perak diberi RM700 sereta engkeraju deka diberi RM500.

Pekit nya diatur kena 21 ngagai 26 November 2010 lalu menua Sarawak udah mujur teulihka champion ti nyengkaum 68 iti midul emas, 91 iti midul perak enggau 74 iti midul engkeraju. Tu meh ungkup ke semilan kali menua Sarawak udah mujur teulihka lumur satu ba pekit lumba enggau main OKU.

Mawan madahka perintah nengeri sigi ngemeratka pemansang ba pengawa lumba enggau main lalu mayuh perambu pemansang udah diatur nyengkaum nyendiaka palan bemain, program pemansang atlet enggau pemansang orang ke ngajar leman main. Program pemansang tu ila deka disaup ari raban pemesai ‘Majlis Sukan Negeri’ (MSN) enggau ‘Institut Sukan Negara’ (ISN).

Mawan mega ngarapka raban atlet OKU tu ulih ngenanka penuduk lumur satu ba pekit ti deka diatur ba taun 2012 Pahang enggau ba taun 2014 iya nya menua Sarawak deka nyadi palan ngatur pekit paralimpiad tu.

Ba pengerami nya, Mawan udah diarika Sekretari Mendam Opis Menteri Pemansang Rama enggau Kandang Nengeri Tuan Hj Soerdiman Hj Aini ti macha jaku teks ari iya.

Sama bela bisi datai ba pengerami nya Kaban Kunsil Nengeri (ADUN) Pantai Damai ti mega nyadi Chief De Mission Dr. Abdul Rahman Junaidi, Pemangku Direktor JKM Joni Nuruddin, Chairman Gerempung Main enggau Lumba OKU Ahmad Usna enggau raban atlet OKU.