Selamat tinggal 2010 helo 2011

0

Mayuh pekara ti tau ngasuh kitai teperansang sekumbang 365 hari ba taun 2010 ke baru sehari udah ngejang. Ari semua utai ti nyadi, aktiviti pemerindang bempu peratus ke pemadu besai. Media chelak enggau media eletronik tentu sekali nyungkak pengeranchak utai ti nyadi nya lalu ba penemu aku iya siti trend baru ti ditentuka ulih kuasa pengerindu ke datai ari orang rebak baru taja pan orang lama tetap enda neju. Industri muzik Dayak ke diatu tau dikumbai baka orang ke benung bejalai diejuka ari belakang lebuh Dayak Artistes and Musicians Association (DAMA) direjister ulih Opis Pengerejister Gerempung (ROS) kena 2 March 2010 suba. DAMA ke lalu nyadi siti entity baru bedaya matak, nyagu sereta ngangkatka pemanah pengawa artis Dayak lebih ari ke udah.

Minggu tu aku sengaja enda ngeluarka berita selebriti tauka cherita sensasi artis tang aku mai kitai sama-sama malik ke belakang enda lama beratika semua utai ke udah nyadi ba kalinda pemerindang 2010; ukai semina berita gaga tang cherita sinu mega sama dilansa. Enda ngawa kitai ngelengkaka enda lama cherita artis popular laban kenang tu semina ayan sekali setaun lalu aku mega sengaja nyelinting maya taun ke benung bekalih – madahka iya ti udah seraya nimpai utai ke bedau.

Ba pengawa pemerindang di Sarawak, taun 2010 ninggalka mayuh kenang ti enda ulih lenyau ari pengingat kitai ukai ketegal iya sensasi tang laban iya udah ngelempaika muzik Dayak ba tikas ke chukup ngasuh kitai temegah. Berita penuh glamour pasal muzik enggau pemujur artis mega udah ngangkatka imej artis Dayak laban muzik moden enggau muzik asal (baka sape) diatu makin dikelala bansa bukai, ukai semina di Asia Tenggara tang udah di serata dunya

Kunsit Lagu Iban Tebilang (KLIT) ke diatur SADIA begulai enggau Radiokitai.com kena 10 April 2010 ba Borneo Convention Centre Kuching (BCCK) nya entara program pemerindang ke besai. Penanyi tebilang baka Maxwell Franklin Saran, Ricky EL, Sima, Linda, Jocey Menti, James Jacob enggau raban Maya ke nyadi band pengiring nya artis ke datai merindang. Kunsit nya udah mai publisiti ke chukup kuat ukai ketegal iya diatur ba endur ke chukup tebilang tang majak mayuh bala ‘promoter’ Dayak ke berani ngujika diri ngatur pengerami bepuku besai taja pan pekara penguntung enggau pengerugi nadai gerenti. Ba aku, pemujur kunsit KLIT nya kelebih agi ba sida ti ngatur pengawa nya, berani ngaku diri “aku ulih” laban enti enda pia kitai nyangka semina nengkilaka pemanah pengawa orang bukai aja.

Pekit Battle Of The Band enggau Pekit Lagu Karaoke nya dua bansa program pemerindang ke pemadu popular ba bansa Dayak. Iya diatur nyauka ba semua bagi menua lalu ambika chunto di Serian, Kuching enggau Bau laban ba menua nya tebal agi diuan bala bansa Bidayuh ke tebilang sereta landik nebah muzik enggau belagu. Ba aku, nya ukai utai ke ngasuh kitai alit ati tang laban pengawa nya nyau majak dikerindu kelebih agi ari bala nembiak ke endang regas datai ngulu pengerami ke bekaul enggau muzik.

Raban Tuku Kame ke enggau masuk ba The 12th. World Championship of Performing Arts (WCOPA) kena 11 – 19 July 2010 di Hollywood mega nyadi siti sejarah. Kebuah pia laban band nya udah menang mayuh kategori nyengkaum open category, original composition, classic composition enggau contemporary composition. Jerry Kamit ke popular enggau muzik sape mega menang ba semua 4 iti kategori solo. Enda ke nya ngasuh kitai temegah?

Taun 2010 mega nyata bendar ngayanka pengerindu orang politik ba pengawa muzik enggau lagu. Enda iran enti sema sekeda ari sida sanggup melanjaka duit beribu ringgit dikena nyukung aktiviti muzik laban sida nemu muzik mega siti media ti ulih ngerapitka kaul enggau diri sama diri. Maya ke bekimpin, bala artis mega suah dikangauka merindang laban nya siti chara ke pemadu ngasi dikena narit ati orang ke datai. Orang dagang enggau raban korporat mega enggai tinggal nyadi sponsor laban sida nemu nya siti peluang ke chukup manah endur ngelakuka utai ti didagangka sida.

Kena 16 July 2010, ba Christian Ecumenical Worship Centre Kuching, pengawa ngelancharka DAMA udah mujur dipenyadika Menteri Pemansang Rama enggau Kandang Nengeri, Dato Sri William Mawan anak Ikom. Pengawa nya besai endar reti ba artis Dayak laban DAMA gerempung ti keterubah ti ngemataka pemujur pengawa sida dalam industri muzik. Kelimpah ari nya, DAMA mega nyadi palan endur sida besemekih ke chara ti tau dikena ngangkatka kualiti enggau standard diri ke nyadi artis. Kepenudi, DAMA meri tanda pengaga nengah anugerah muzik ke diatur sekali dalam timpuh dua taun lalu nya meh program highlight ti dianti semua.

Enti diperati enggau betul, belabuh ari 16 July 2010, industri muzik Dayak ngenyitka diri ngagai siti fasa ke lebih agresif, ke alai semua orang merening DAMA ukai semina kitai di Sarawak tang sida di Semenanjung enggau Sabah ke ngelamatu bedau tentu ngelala bagi muzik Dayak ti bendar. Penatai enggau peluang ayan ba TV3 enggau TV1 mega pemujur ke udah chukup manah ba DAMA laban ba kitai nya meh tanda industri muzik Dayak makin mansang makin dikerindu ari ke udah.

Pemujur DAMA ngatur Anugerah Muzik Dayak (AMD) 2010 mega siti sejarah. Kebuah pia laban iya pengerami pemerindang ke pemadu besai udah diatur ulih raban asal bansa Dayak. Taja pan iya bedau tentu tau dibanding enggau AIM tauka AJL TV3 baka di Semenanjung tang kitai udah ulih nengkebang kediri laban AIM udah 17 taun ngatur anugerah ke bansa nya lalu TV3 ke udah 25 taun ba pekara ke sebaka. Ba kitai, senario nya utai ke chukup manah laban kitai sigi deka belajar ari orang ke dulu bisi peneleba.

AMD 2010 ke diatur kena 6 November 2010 ba BCCK mega siti pengingat ke besai. Iya ukai semina udah ngangkatka nama industri muzik Dayak tang AMD 2010 mega siti “kejutan” lebuh Masterpiece bulih 5 iti anugerah, artis ke baru setaun jagung menang besai taja pan enda disadang ulih sekeda orang. Ba tiap-tiap pekit tauka anugerah, pekara ti enda disadang sigi tetap nyadi. Alah enggau menang mega sigi adat lalu sida ke menang endang gaga tang sida ke alah 150 peratus sigi mantah kelebih agi sida ke nyangka diri empu menang.

Bala komiti pengatur malam AMD 2010 mega enda ulih nyeliahka ari jaku puji enggau komen bantah. Munyi ku aku ngelamatu, DAMA baka anak mit ke baru belajar bejalai, bedau ulih diasuh belanda. Taja pan pia, DAMA sigi beterima kasih ngagai komen ti nyeruri ke tau nyadi lalau maya ke dudi hari ila. Terima kasih ngagai kita ti meri komen nyeruri nya.

Ari gaya utai ke nyadi ba malam AMD 2010 nya suba, sekeda ari kitai nyangka baru nemu kitai bansa Dayak udah bisi orang ke profesional kelebih agi sida ke bisi Event Management kediri empu. Ukai nyamai ngatur malam AMD 2010 nya taja pan kitai bechuntoka konsep AIM enggau AJL. AMD 2010 mega begunaka raban akim enggau tukang audit profesional (Ernst & Young) ke jarang tentu diguna kitai maya ke dulu suba. Ari segi ngatur pengawa, kitai endang enggau naka ulih nitih ke chara sida di Semenanjung semina AMD 2010 enda ditaburka terus ba TV. Taja pan pia, kitai endang beterima kasih ngagai TV3 ke udah meri peluang ngayanka AMD 2010 ba program Melodi lalu terima kasih mega ngagai TV1 ke udah interview artis DAMA.

Kombo DAMA mega siti pekara ti tau ngasuh kitai tekepang. Kebuah pia laban kitai enda nyangka pemuzik Dayak ke ngelamatu semina ngati kediri ulih begulai ba kombo nya. Taja pan iya bedau ngemanah baka Kombo RTM tauka ngelandik raban muzik bukai ke lama udah ayan tang kitai udah berengkah ngepunka diri. Ba tiap-tiap bagi pengawa, kitai sigi enda ulih berengkah ba utai ti manah tang belabuh ari baruh. Taja pan pia, kitai ulih berubah manah enti kitai pechaya sereta arapka diri empu. Ba aku, pechaya enggau pengarap nya kunchi pemujur.

Simpul

Bala pemacha, ni gaya pengulih kita ba taun ti udah? Nambah? Agi kurang? Utai ke ulih siku-siku kitai sigi enggai nyadi sebaka laban nya bepanggai ba berekat diri. Taja pan pia, kitai semina sebaka laban sama-sama bisi kenang. Simpan ke manis lalu buai ti pait. Ubah diri, ngena chara diri lalu nyadi meh diri empu. Selamat tinggal 2010, helo 2011. Mupuk dulu lalu teperindang meh enggau lagu baru ari Stevenson – Joget Nginsap Tekuyung. Woooooow….