Home - Utusan Borneo - Berita Iban - Medan nerima bantu kerusi roda
Medan nerima bantu kerusi roda
Posted on January 20, 2011, Thursday
LUBOK ANTU: Parti Rayat Sarawak (PRS) sitak Engkilili mujur meri bantu kerusi roda ngagai Medan anak Barau ke diau ba rumah panjai Sbangki Panjai, Lubok Antu, Sri Aman, malam ensanus.
Pemeri nya datai ari penyiru Kaban Parlimen (MP) Lubok Antu ti mega nyadi Chairman PRS Engkilili William Nyalau anak Badak ngagai Orang Nyelai Pendiau (OKU) ba genturung pelilih menua ke dipegai iya.
Pemeri kerusi roda nya ulih ngenyamaika agi pejalai Medan mindah kin kitu ti mujur disuaka Sapit Raban Nembiak PRS Engkilili Edwin anak Raoh ngarika Nyalau ba pengerami ke diatur ba Sbangki Panjai, malam ensanus.
Medan, 55, patah kaki mua kanan ketegal ke udah kena kepit kayu lebuhka ngawa ba Sandakan taun 60-an suba.
Pengawa ke bansa tu kedua kali udah diatur Nyalau, ke terubah suba iya mujur meri kerusi roda ngagai Tampie anak Balai ari Rumah Panjai Munan, Nanga Ensawang pelilih menua mit Lubok Antu kenaka bulan Disember taun nyin kemari.
Bisi datai ba pengerami nya Tuai Rumah Jubang anak Bin.
<< Previous Entry - Next Entry >>
Advertisement
