Ngelempaika semua runding ngagai chairman BN ngaga pemutus sekalika enda iya ngetanka penuduk nya
KUCHING: Menteri ba Opis Kepala Menteri ke mega nyadi Kaban Kunsil Nengeri (ADUN) Dalat, Datin Fatimah Abdullah madahka sekalika iya ngetanka penuduk tauka enda ba pengawa bepilih menua Sarawak ke deka datai endang bepanggai ngagai presiden parti.
Lebuh dikerandau pemberita sekalika udah nyikap diri napi pengawa bepilih ke deka datai iya madahka semua pengari ke udah dipilih endang semamapai bejalaika pengawa enda ngira maya sereta timpuh.
Iya madahka, aum Raban Indu Parti Pesaka Bumiputera Bersatu (PBB) bisi diatur kena 1 Februari endur chairman parti bejuraika sekeda pekara bekaul pengawa bepilih.
“Aku nitihka atur, sekalika mengkang ngetanka penuduk tauka enda endang dilempaika ngagai presiden parti enggau BN ngadu pemutus.
“Taja pia, kami ke nyadi kaban politik patut seruran besedia dalam semua pekara, ukai semina maya pengawa bepilih diatur, tang gawa sepemanjai taun nitihka tanggung pengawa ke udah diberi,” ku Fatimah madah udah aum dipejalaika baru ulih ngenang pekara nya ngagai pemberita.
Fatimah ti mega nyadi Timbalan Ketua Pergerakan Wanita PBB mansutka jaku iya ngagai pemberita sepengudah bejadika Aum Besai PERKIM Indu pampang Kuching ke diatur ba DUN Lama ditu, kemari.
Berebak enggau nya Fatimah ke ngenang aum BN ke diatur di Miri kena 6 Februari iya madahka aum enggau Menteri Besai diatur kena ngenataika isu ke bisi nyadi, baka ke udah diatur enggau kaban Parlimen apin lama ke udah.
“Ba aum enggau Menteri Beasai nya ila semua kami deka mantaika pasal isu ke nyadi ba sitak diri empu, baka nya mega aku,” ku Fatimah ti enggai madahka pekara ti deka dipejuraika dalam aum nya ila.
Kelimpah ari nya,lebuh ditanya sekalika mayuh agi orang indu bediri kena pilih maya pengawa bepilih besai menua iya madahka pekara nya nadai penyalah seagi orang indu kelebih agi komponen BN ulih bejalaika tanggung pengawa.
Ba Sarawak ku Fatimah ngembuan mayuh bengkah parti, penyampau orang indu gawa dalam politik mega tau ditambahka mayuh agi.
“Berindik ari pengering, penau sereta pengelandik orang indu kemaya hari tu, nadai salah kitai milih mayuh agi orang indu nyadi pengari kelebih agi dalam kompenan BN, kitai mega meda ari asil pengawa ke dikereja,” ku iya.