DEBAK: Kabinet menteri udah ngemendarka Opis Menteri Pengereja Pengawa bejurai enggau raban betanamka puku sereta gerempung orang gawa kelebih agi ba pengawa bekebun enggau sektor ke bukai nengah Majlis Perundingan Gaji netapka gaji ke baru ngambika ulih ditikika agi. Naka kediatu, pupu rata gaji raban nya semina entara RM450-RM600 sebulan.
Sapit Menteri Besai Tan Sri Muhyiddin Yassin madah tuju pekara nya diatur ngambika ulih dikena mutarka penanggul penatai pemisi ba sektor ekonomi ti ukai semina kena ba sektor kebun aja tang mega nyerangkum semua sektor laban gaji raban nya kelalu mit.
“Dalam timpuh ke umbas iya diatu, Menteri Besai (PM) udah mutuska sekeda ari kebun ke diempu ulih kompeni ke bisi bekaul enggau perintah (GLC), ambika chunto baka Sime Darby tauka kompeni perintah ke bukai.
“Kami empu deka ngambi inisiatif baka tu bejurai enggau opis pengatur GLC bakani ku chara nambahka agi gaji sida ke gawa ba sektor tu. Semina formula nya bedau diputuska agi. Nya alai kitai berengkah enggau Sime Darby dulu laban sida ke mayuh agi kebun ba serata menua tu, lalu berindik ari nya ila GLC bukai tau nunda chara sida iya,” ku iya.
Iya madah baka nya lebuh bejadika atur pengawa Ketuai Begulai enggau Rayat ba Stesen Bas pasar Pusa ditu, kemari.
Senentang orang ke gawa ba kebun ke datai ari menua luar gawa ba menua mega deka diberi atur ke sebaka tang kitai deka ngemeranka agi ngagai orang ari menua tu dulu.
“Ke terubah ngambi orang gawa ba kebun menua tu endang orang menua tu dikemeratka dulu tang enti udah nadai orang menua tu empu kedeka gawa ba kebun kitai, orang ari menua luar pan sama tau ngulihka gaji sebaka. Ila kitai mutuska baru,” ku iya.
Naka kediatu, pemayuh orang ke gawa ba kebun menua tu ditaga urung 100,000 iku.
Ku Muhyiddin baru, gaji sida ke gawa ba kebun sigi patut ditikika laban ekonomi menua tu mayuh bepanggai ba pengawa bekebun, baka bekebun sawit, nangkal getah ti ulih ngangkatka ekonomi menua tu.
“Kitai semua nemu rega sawit enggau getah entara produk kebun ke pengabis manah. Nya kebuah sigi bisi asil nikika gaji sida ke gawa ba kebun ngagai gaji ke besai agi, ke jauh manah agi.
“Lebuh aku bejalai beratika sekeda kebun kitai ba menua tu, aku dipadah sekeda orang ke gawa dia, gaji sida semina entara RM400 ngagai RM500, abis besai pan urung RM600 sebulan.
“Enti dikira, tikas miskin seranta kitai enti nitih lebih tinggi ari nya, tang sida tu semina bulih gaji ke mit agi ari tikas seranta. Tu utai ke enggai dipeda kitai nyadi ba menua kita,” ku iya.
Atur keterubah ku Muhyiddin, iya nya bejuraika pasal gaji dulu enggau Majlis Perundingan Gaji lalu komiti tu megai tanggung pengawa deka berandau pasal pekara tu enggau sida ke ngaji orang gawa ba sektor kebun, bakani ku chara sempekat pemereti ati ulih dijapai, besedia mayar gaji enggau besai agi.
“Nya alai pemutus ke diulih sida iya ila ari randau tauka aum pasal gaji orang gawa ba kebun anang enda dipejuraika enggau jampat laban enti kelalu lama orang enda arap ke kitai agi. Nya kebuah pekara nya patut diputar enggau jampat entara GLC, perintah enggau sida ke gawa ba kebun.
Sama bisi ngulu ke atur pengawa nya kemari, Menteri Pemansang Menua Pesisir enggau Kandang Menua Dato Sri Shafie Apdal, Sapit Kepala Menteri ti mega nyadi Menteri Pemansang Menua Pesisir Datuk Patinggi Tan Sri (Dr) Alfred Jabu, ADUN Beting Maro Datuk Bolhassan Di,Sapit Menteri Pemansang Menua Pesisir enggau Kandang Menua Datuk Joseph Entulu Belaun, ADUN Bukit Saban Robert Lawson Chuat enggau Residen Pelilih Menua Betong Datuk Rommie Sigan Daniel.