Orang dagang patut begunaka servis ke jampat, mujur sereta bekualiti

0

KUCHING: Orang dagang maya ke diatu deka begunaka servis sukung iya ke jampat, mujur agi sereta bisi ngem­buan kualiti ti ulih muka runding ke baru dalam atur ngereja pengawa kelebih agi ba pengawa pemadah, pen­yambung enggau teknologi (ICT).

MORSHIDI ABDUL GHANI

“Reti nya, raban pengeraja pengawa perintah deka se­ruran ngemansangka atur kereja nengah e-goverment ke ulih ngurangka pemayuh keretas ke dikena maya ng­atur pengawa lalu tu deka dikemeranka nyadi siti ari gaya kereja,” ku Sekre­tari Menua Sarawak Datuk Mohamad Morshidi Abdul Ghani.

Iya mansutka jaku tu lebuh bejadika Licha “Forum On Modernizing Business Regu­lation” ke diatur Perbadanan Produktiviti Malaysia (MPC) begulai enggau Unit Pe­mansang Modal Mensia enggau Kualiti (HRDQ) Opis Kepala Menteri sereta Unit Permodenan Tadbiran eng­gau Perancangan Pengurusan Malaysia (MAMPU) ba siti hotel ditu, kemari.

Iya mega madahka MPC deka nyendiaka sukung ngagai Palan Pemujur Pe­mansang Bansa (NKEA) nengah atur pansik sereta ngenataika runding enggau chara baru ke ulih ngemu­ntangka pengawa tang meng­kang ngadaka asil kereja ke ngembuan kualiti ke tinggi.

Lebuhka bejaku mega, Morshidi ngelalau genap opis perintah tauka swasta patut beratika atur enggau adat ngereja pengawa ngam­bika enda kelalu ngenusahka raban pengereja pengawa enggau mensia mayuh ke begunaka servis sida.

“Atur enggau adat genap bengkah opis patut mudah dikena nitihka peneka eng­gau peminta raban pengere­ja pengawa sereta mensia mayuh.

“Pia mega enda ngenusa­hka raban peminta servis sereta ngembuan tuju ke ulih dijapai, tang patut ngem­buan asil kereja ke tinggi,” ku iya.

Ba opis perintah ku iya, Key Focus Aktivities (KFA) udah ditumbuhka ngambika ulih ngaga ubah nuju penyampat ba genap pengawa meri servis lalu naka ke diatu udah bisi 125 KFA ba serata nengeri Sarawak. Tu meh atur ke udah digaga kena mantu pro­gram “Modernizing Business Regulations’ .

Entara pemesai ke bisi meri jaku ba licha nya Sapit Direk­tor MPC Abdul Latif Abu Se­man, Pemangku Tuai Luyar Perintah Nengeri Sarawak Francis Johen enggau Chair­man FMM Sarawak Othman Abdul Rani.

Sama bisi datai ba pengera­mi nya, Direktor MPC Datuk Abang Abdul Karim, Sekre­tari Perintah Menua Malaysia (Sarawak) Datuk MD Yahaya Basimin, Direktor HRDQ Sabariah Putit, raban tuai perintah nengeri enggau swasta sereta orang bukai.