Perintah beratka saup ari JKKK, ku Harden

0

SRI AMAN: Kerejasama ke tegap entara Komiti Pengelikun enggau Pemansang Genturung Pendiau (JKKK) enggau perintah beguna amat dikena ngemujurka semua atur projek ke udah diperambu.

Menteri Muda Pemansang Tanah, Datuk Francis Harden Hollis madahka JKKK indah enda baka mata enggau pending perintah, nya alai berat amat kededua piak bela besaup ngemansangka genap genturung diri.

“Genap kaban JKKK patut besaup ngambika atur pemansang ulih dipejalaika enggau muntang sereta nyapai juluk ke penyenang semua.

“Enti JKKK enda besaup enggau perintah dia genturung nya deka tinggal ari semua arus pemansang.

Iya ke mega pengari Kunsil Nengeri (DUN) Simanggang bejaku munyi nya ba Program Ketuai Begulai enggau Rayat ke diatur Parti Pesaka Bumiputera Bersatu (PBB) N.27 Simanggang begulai enggau Opis Hal Ehwal Khas (JASA) Sarawak Pelilih Sri Aman ba Rumah Sap, Batu Lintang Undop ngimbai Sri Aman malam ensanus.

Ku iya, semua program pemansang ke diatur perintah patut disukung genap serak mensia enti deka ngasaika penguntung.

“Tebal genturung pendiau sereta rumah panjai agi balat begunaka projek pemansang, nya alai perimtah balat begunaka saup ari mensia mayuh dikena ngemuntangka pejalai pengawa pemansang,” ku iya.

Bejaku nandu nya baru, Harden ngarapka semua JKKK ba menua tu ransing ngereja pengawa ngambika ulih nyapai juluk gerempung nya dipunka.

“JKKK sebengkah alur endur rayat ngenataika semua penanggul ngagai perintah….ari nya sida patut chakah ngambika penguntung ke dijapai pulai ngagai semua rayat,” ku iya.

Dulu ari nya, Sapit Speaker Dewan Rakyat, Datuk Dr Haji Wan Junaidi Tuanku Jaafar bejadika programnya.

Bela bisi ngulu pengerami nya, Kaban Parlimen Sri Aman, Masir Kujat, ketuai opis perintah, tuai raban bansa sereta kaban parti ari komponen BN ke bukai.

Nyerumba pengawa nya, Wan Junaidi nyuaka replika chek sepenyampau RM160,000 ungkup JKKK genturung DUN Simanggang.