Pengawa berikan ngena rachun salah ba undang-undang: Hasbi

0

LIMBANG: Mensia mayuh dilalau ngetuka pengawa berikan nengah chara ti salah baka ngerachun, nubai enggau ngebom laban chara ke baka nya tau munaska utai idup dalam ai tauka ba sungai.

Kaban Parlimen Limbang Hasbi Habibollah mantah enggau keras pengawa nya, laban pengawa ti ngerachun kena ngulihka ikan ari sungai Limbang  salah ba undang-undang.

Ku iya, Lembaga Sungai-sungai Sarawak (LSS),Opis Berikan enggau ijinsi perintah ke bukai patut matau sereta mutarka pekara nya.

“Kitai nemu bisi pengawa ngerachun tauka nubai kena ngulihka ikan enggau undang ba Sungai Limbang. Beduduk ari nya, kami minta mensia mayuh ngetuka pengawa nya ,” ku iya bejaku ba Program ngelepaska 360,000 Anak Undang Galah tauka nama saintifik iya, ‘Macrobrachium Rosenbergi’ ensanus.

Program nya diatur Opis Betanam Betupi Pelilih Limbang ti udah milih Sungai Pandaruan, Sungai Limbang enggau Taman Tasik Mas nyadi palan ngelepaska anak undang nya.

Sama bisi ngulu pengawa nya Pemesai Opis Betanam Betupi  Pelilih Menua Gilbert Igi, Pemesai Opis Berikan Darat Dr Stephen Sungai, Pemesai Opis Pemadah Pelilih Mit Menua, Siti Mariam Mahdar enggau bala temuai ke bukai.

Ku Hasbi, ijinsi ti megai tanggung pengawa nya patut regas agi bejalaika pengawa sida nyengkaum neritka adat ti endang udah bisi kena mutarka pekara nya.

“Sebedau pekara tu nyadi enggau balat agi, ijinsi ti megai tanggung pengawa nya patut  matau pengawa berachunka ikan ti tau munaska ikan enggau utai idup ba sungai,” ku iya.

Iya mega madahka pengawa ke baka nya semina deka nguntungka diri empu aja sereta enda berundingka orang bukai ti sama ngemunka pengawa berikan sebengkah jalai penatai pemisi sida.

“Pengawa nya  ukai semina munaska utai ti idup ba sungai, tang mega ngenusahka  orang berikan ke bukai ke sama bela bepanggai pengidup ba sungai nya nyadi jalai penatai pemisi sida,” ku iya baru.

“Pengawa nya mega ukai semina  ngerusak pengidup dalam ai tang mega ngerusakka rampa menua ,” ku iya.

Ku Hasbi nandu, Perintah amat beratka utai ti idup ba sungai enggaika abis punas nengah mayuh bengkah pengawa ti diatur kena ngiri penemu deka dikereja belama.

“Nengah program ke baka nya, penyampau undang deka nambah sereta beranak dalam kandang pemadu kurang pan empat bulan,” ku iya.

“Pengawa nya tadi ulih nambahka asil pemisi raban orang berikan enggau mensia mayuh ti bepanggai ba pengawa berikan nyadika pemansut penatai pemisi sida ngelama tu.

“Inisiatif nya mega  ulih nambahka tikas sosio-ekonomi mensia mayuh ti diau nebing sungai nya.” ku iya.