Mayuh pekit diatur baka pekit Kumang,pekit Keling, kajat emas enggau mantaika main asal bukai
SIBU: Pengerami Makai Lemai beserimbai enggau Gawai Dayak 2011 renggat Sibu ti diatur ba sebengkah hotel tebilang ditu, disempulang enggau mayuh program ti ngerinduka ati kelimpah ari nyadi ke kenang bala ke bisi datai.
Gawai taun tu diatur Serakup Dayak Sarawak (SDNU) pampang Sibu begulai SDNU Rajang Basin, SDNU Sibu Jaya, Serakup Indu Dayak Sarawak (SIDS) pampang Sibu, Gerempung Bidayuh (DBNA) Sibu enggau Gerempung Orang Ulu (OUNA) Sibu.
Sapit Kepala Menteri Datuk Patinggi Tan Sri Alfred Jabu Numpang ti nyadi tuai pengabang malam nya diberi basa bejadika pengerami nya.
Urung 2000 iku bala serata mengeri tu enda bebuai awak ngulu pengerami ti ngena rambai jaku ‘Segulai Sejalai Sepenemu’ tu.
Komiti pengatur pengerami bisi nyelitka mayuh bengkah program baka ‘kajat emas’, tikit benasit, pekit kumang enggau keling, lagu sepunsa, mantaika main asal, sereta beperindang enggau artis menua tu.
Pengerami tu mega endur ngeradak ai pengayu ba adat Iban kena ngepun ngintu Gawai Dayak. Kelimpah ari nya, bisi 157 iku bala nembiak ti udah nyulut ba peresa perintah UPSR, PMR, SPM enggau STPM taun siti nyin kemari nerima bantu peransang tauka insentif.
Ba pekit kumang, Susie Miggi dipadu megai gelar Kumang Gawai Sibu 2011 lalu penuduk lumur dua diempu Pauline Mengga sereta ditangkan Annathassia Ellam ba penuduk lumur tiga.
Gelar Keling Gawai Sibu 2011 diempu Jimmy James sereta ditangkan Stallone Sawang Jemeb enggau Patrick Igat Igang lumur tiga.
Sama bisi datai maya tu iya nya Sekretari Mendam Pemansang Betanam Betupi Sarawak Datu Dr Ngenang Jangu, Direktor Besai Komiti Penyerakup enggau Pengintu Tanah Sarawak (SALCRA) Datu Vasco Sabat Singkang, Panglima 9 Bridge Stephen Mundaw, Residen Sibu Sim Kok Kee, Temenggung Sir Adrian Ringgau, Pemancha Wilfred Kiruh enggau Chairman Komiti Pengatur Gawai ti mega Chairman SDNU Sibu Chambai Lindong.
Kelimpah ari nya, Chairman SDNU pati Rajang Basin Mejar Moses Ripai, Chairman SDNU Sibu Jaya Steven Rom, Chairman SIDS Sibu, Ir Alice Jawan, Chaiman Gerempung Bidayuh (DBNA) Mejun Abang enggau Chairman OUNA Sibu Lade Kulong bela bisi ngulu pengerami tu.