KUCHING: Ketuai Gerempung Penyerakup Apai Indai Malaysia (Mapim) Sarawak Wan Zain Syed Mohdzar madahka pengawa jadi tauka nikah bechampur enggau bansa bukai tau nyaruka jaku bansa asal ba menua tu.
Ku iya, taja pia pekara tu ulih diputarka enti apai indai mereti sereta ngintu jaku sida enggau manah agi sebedau pekara nya balat nyadi ketegal leka jaku bechampur tauka nengah seling jaku nya.
Iya bejaku munyi nya lebuh ti ngenang juluk Bagi Iban Utusan Borneo ti deka ngatur UB Forum Iban kena ngerembaika Jaku Iban.
Wan Zain meri sukung ba pekara nya kemari lalu minta Bagi Iban Utusan Borneo besaup enggau sida ngatur pekara nya.
Iya mega madahka forum nya patut bepelasarka Jaku Iban lama enggau ke diatu ngagai mensia mayuh nyadika sebagi ari tusun jerita jaku Iban sereta ngerembaika pekara nya.
“Tuju penemu tu deka ngintu sereta ngerembaika Jaku Iban ngambika enda nyaruka runding.Penemu ke baka tu mega patut dikerembaika raban bansa bukai baka Melayu, Melanau, Cina enggau raban pupu bansa bukai ngambika sida temegah ati ke jaku diri,”ku iya.
“Pengawa belaki bebini tauka nikah champur enggau raban bansa bukai sebengkah ari kebuah jaku nya tau nyaru kitai , taja pia pekara tu ulih diputarka lalu siti ari chara mutarka iya nya minta apai indai mereti pemesai reti bekenaka leka jaku betul ba rumah tauka lebuh bejaku enggau mensia mayuh.
Semina nya mih chara sida ngerembaika pekara nya,” ku iya. Enti kitai meretika jaku diri, pengerembai enggau tusun jerita iya, baru sida ulih temegahka penatai, adat asal, raban bansa sereta ekonomi, ku Wan Zain nambah baru.
Kena ngangkatka jaku nya, kitai tau nambahka pengawa nabur tauka bekenaka jaku nya ba radio enggau televisyen, ku iya.
Ila, patut mayuh agi berita Iban dipansutka nengah radio tauka televisyen. Sida ulih belajar lebuh ninga nya,” ku iya.
Forum nya patut diatur enggau mujur ngambika tau nyadi teladan ngagai raban bansa bukai.
Jaku nya patut dikerembaika nengah konsep 1Malaysia sereta enda ngachau pengelikun enggau penyerakup, ku iya. “Jemah ila patut nadai agi integrasi bansa tang bisi penyerakup aja,” ku Wan Zain ke dipaduka nyadi seiku ari komiti Forum Iban nya.
Komiti pengatur pengawa ke bukai nyengkaum editor Berita Iban Utusan Borneo Edwin Jemat enggau Sapit Sekereteri ba Opis Menteri Rama enggau Kandang Nengeri (KPSU) Hamdan Sharbini.
Mapim Sarawak deka begempung ngatur Forum Iban nya enggau Utusan Borneo Bagi Iban sereta mega begulai enggau KPSU.
Raban nya – Mapin Sarawak, Utusan Borneo Bagi Iban enggau KPSU – deka berandauka pekara nya baru sehari tu ba sebengkah hotel. Forum Iban nya deka diatur ba petengan bulan September taun tu lalu palan endur Forum nya diatur deka ditetapka ila.
Minggu siti nyin kemari, UB Bagi Iban pengatur pengawa UB Forum Iban udah betemu enggau Menteri Pengawa Rama enggau Kandang Mengeri Tan Sri William Mawan Ikom ngenataika langgur deka ngatur Forum Iban nya.