NGO dipinta chakah ngereja pengawa dalam raban bansa

0

SARIKEI: Gerempung ukai kuasa perintah (NGO) patut chakah agi enggau ngatur pengawa mantaika sesebengah pekara ke manah ngagai mensia mayuh.

Kaban Parlimen Sarikei, Ding Kuong Hiing madahka sukung sereta tulung ari raban tu pengawa tu sigi besai endar reti dalam raban bansa.

Ku iya, mensia mayuh diatu patut ngembuan penemu ke tinggi lebuh ti megai tanggung pengawa, kelebih agi ngagai orang ti begunaka kaul ari semua raban ti deka mai pemaik ngagai semua.

“Kitai patut ingat mayuh mensia bukai ba menua tu ngarapka pemeri kelebih agi bekaul enggau darah.

“Bakaa ke ditemu kitai diatu, agi mayuh tabung darah ba sepital dalam menua tu napi penanggul kurang stuk darah.

“Pekara ke baka tu begunaka pemeri ari mensia mayuh kelebih agi kena nyelamatka nyawa,” ku Ding.

Iya bejaku munyi nya lebuh ti berandau enggau pengarang berita udah tembu ngulu pengawa Meri Darah ti diatur Gerempung Pengintu Pengidup Sarikei (PPHS) ba Dewan Suarah Sarikei, ensanus.

Seraban 93 iku orang ke bisi meri darah dipampas enggau beras lima kilogram seiku kelai meri terima kasih ngagai sida.

Ku Ding, raban PPHS patut nerima sukung penuh sereta diberi puji laban ngelama tu raban PPHS suah endar udah ngatur pengawa ke baka nya sereta nadai ngarapka sebarang balas.

“Pengawa ke baka tu patut nyadika teladan ngagai raban bukai lalu arang ngarapka balas lebuh ti ngatur pengawa ti pulaika pemanah ngagai semua ke baka tu.

“Enggau awak nya mega iya minta semua serakup enggau gerempung regas agi ngeeja pengawa ti tau mai pemanah ngagai semua kena ngelaungka pengawa malutka diri enggau pengawa ke enda menuku,” ku Ding.