DARA BAJIK: Bala indu dara ti masuk pekit Kumang Gawai Dayak 2011 Tikas Bansa begambar enggau bebala mayuh begulai enggau Ose (tengah bediri), Minos (bediri tiga kiba) enggau Snowdan (bediri tiga kanan).
KUCHING: Lima belas iku indu dara deka berebut gelar Kumang Gawai 2011 tikas bansa ti deka diatur di Rumah Wilson Begat Ak Bakir di Penom, Ulu Paku Betong kena 11 Julai ti deka datai.
Ari penyampau nya tiap lima iku ari sida tu deka ngarika sesebengkah raban bansa iya nya Bidayuh, Iban enggau Orang Ulu.
Kelimpah ari nya seraban 40 iku bala orang ngajat ari Yayasan Main Asal Dayak (YKD) mega udah disedia ti deka mantaika pengelandik sida lalu ngeramika Gawai Dayak tikas bansa ti diketerubah disambut ba rumah panjai.
Nambahka nya komiti pengatur pengerami mega udah ngangau lima iku penyanyi ari tiap pupu bansa dalam raban bansa Dayak dikena memerindang bala pengabang rambau tu ila.
Raban penyanyi tu iya nya Ricky Andrewson Ngalai, Winnie Albert enggau Lucy M ari raban bansa Iban, Emil Hamlyn, Claudia Geres enggau Lydia Mike Rantai (Bidayuh) lalu Rosiana Urai, Eddie Kuwing enggau Diana Nini (Orang Ulu).
Semua raban sida tu nyengkaum kumang, ngajat enggai belagu ditaur belatih di Kuching ditu sebedau sida mupuk ke Betong. Raban sida tu deka berangkat ke Betong kena hari tu.
Ensanus raban tu bisi dikerami ka ba Makai Lemai.
Bisi ngulu pengrami tu iya nya Sapit Sekretari Menua, Datu Ose Murang, Sapit Chairman Rumah Terbuka Gawai Dayak 2011 Tikas Bansa Snowdan Lawan ti mega Presiden Pemuzik Dayak (DAMA).
Komiti pengatur pengerami mansutka penerang ti madahka tu meh sebengkah gawai ti enda tau enda digulu mensia mayuh ukai semina sida di Betong tang mega orang ari menua bukai.
Sapit Menteri Besai, Tan Sri Muhyiddin Yassin disadang deka nya tuai pengabang ba pengerami tu ila.
Kelimpah ari nya Kepala Menteri, Pehin Sri Abdul Taib Mahmud enggau Menteri Pemadah, Penyambung enggau Main Asal Datuk Seri Utama
Dr Rais Yatim diadang sama datang ngulu pengerami tu ti deka diatur ba rumah panjai beumur 85 taun nya.
Apin lama ti udah, Komiti Begulai Pengatur Pengerami, Datuk Joseph Salng Gandum nyadangka bisi 3,000 pengabang deka datai ba pengerami tu ila.