SDGA numbuh wang turu pelajar

0

KA TANDA PENGINGAT: Mawan nerima pemeri tanda kenang ari Dusit epengudah randau entara raban SDGA ba opis iya.

Gerempung nulung nembiak Dayak ti nyulut dalam pelajar nampung ngagai IPT

KUCHING: Sarawak Dayak Graduate Association (SDGA) deka numbuhka wang turu pelajar dikena mantu bala nembiak ke bulih pemujur dalam peresa dikena nampung pelajar sida ngaga institut pelajar tinggi (IPT).

Presiden SDGA, Dr Dusit Jaul madahka, tuju wang turu tu ditumbuh ngambika ngelempung tanggung pengawa apai indai nembiak ti bisi penekul ba belanja lebuh ti deka nganjung anak sida nampung  pelajar.

Ku iya, SDGA deka ngepunka wang turu tu ngena belanja RM100,000 ti deka diberi nggai bala pelajar berebak enggau sida ti nganti bantu ari Gerempung Wang Turu Pelajar Tinggi Bansa (PTPTN).

“Tabung tu ditumbuh ngambika ulih mantu raban nembiak dayak ke nyulut dalam peresa tang  kurang penatai pemisi nampung pelajar  ngagai IPT.

“Kami pechaya bantu tu ila ulih ngelempungka tanggung apai indai nembiak ke bisi penekul ba belanja nganjung anak sida iya nampung pelajar ngagai IPT seraya nganti bantu ari PTPTN ngambika pelajar anak sida enda tejanggal,” ku Dr Dusit.

Ku iya, gerempung tu endang ngemeratka bantu ngagai nembiak ari menua pesisir ke bulih penuduk belajar ba palan IPT lalu bantu nya nyengkaum bebelika tikit bilun, mayar kos belajar, meli bup sereta perengka belajar ke bukai.

Iya madahka, nembiak ke bulih bantu tu ila semina deka dipinta mayar  penyampau ke diinjau sepengudah sida iya tembu belajar lalu bulih kereja.

Ku iya, gerempung tu mega nadai netapka bunag ba duit bantu tu ila.

Dr Dusit mansutka  jaku tu ngagai pengarang berita sepengudah ngulu raban komiti SDGA nemuai meri bansa ngagai  Menteri Pemansang Rama enggau Kandang Mengeri Tan Sri  William Mawan.

Berebak enggau nya, Dr Dusit ngelalau raban tuai dayak sama bela beserakup meri bantu ngagai tabung tu ngambika pelajara nembiak dayak ari ruang bilik tu kurang penatai pemisi kelebih agi ke datai ari menua pesisir enda tejanggal.

Ku Dr Dusil, SDGA deka ngatur pengerami makai lemai kenaka 30 Julai 2011 ba siti hotel ditu lalu raban tuai dayak ke nyengkaum raban menteri, kaban kunsil nengeri enggau kaban Parlimen bisi udah ditesau datai ngagai pengerami nya alai sida iya ulih meri bantu ungkup tabung nya.

“Pengerami makai lemai SDGA diatur ngambika ulih ngumpul duit ungkup tabung nya ke deka mantu raban nembiak dayak ke kurang pemisi nyambung pelajar ba renggat ke tinggi agi.

“Kitai ngarapka tabung tu ulih berengkah ngena belanja enda kurang ari RM100,000,” ku iya.

Ba pengerami ke sebaka kemari, Menteri Pemansang Rama enggau Kandang Nengeri Tan Sri William Mawan madahka SDGA udah numbuhka tabung ke chukup manah ke ulih mantu pengawa pengerembai pelajar nembiak dayak.

“Tabung bantu pelajar ke ditumbuhka SDGA tu chukup manah lalu aku sigi nyukung pengawa tu.

Raban SDGA kemari nemuai ngagai opis Mawan ngenataika pengaga ati sereta meri basa ngagai Mawan sepengudah iya nerima pingat Panglima Setia Mahkota (P.S.M) ke mai gelar Tan Sri ari Yang Dipertuan Agung Tuanku Mizan Zainal Abidin sereta ngenataika juluk ati minta iya nyadi patron ba pengerami makai lemai nya ila.

Gerempung tu mega deka numbuhka ‘Board of Trustee’ ke deka bejalaika pengawa ngintu sereta ngerembaika duit tabung nya.