Pengawa miring ulih narit ati temuai

1

DITANKA: Abu Seman (tiga kanan) enggau bala kebukai maya pengawa miring apin bejadika pengerami Ngiling Tikai ba Rumah Mering kena hari minggu tu tadi.

Pengaya adat asal bansa Iban mai penyelai enggau pengelebih, ku Seman

SIBU: Rayat bansa Iban lebih agi bagi pegai Kunsil Nengeri (DUN) Jemoreng ditangkan ngetanka peneguh adat asal laban beguna bendar ngambika dikerekai sereta dikerengkun nembiak ke maya hari.

Kaban Kunsil Nengeri (ADUN) Jemoreng, Abu Seman Jahwie madah, adat asal, chara pengidup enggau pengaya main asal bansa Iban ba nengeri tu meseti ditan lebih agi pekara tu siti ari jalai nyungkakka agi tikas dagang temuai.

“Lalu siti ari adat asal iya nya pengawa miring ti nyadika batang tuju ke ulih narit temuai ari menua luar datai nemuai ngagai menua kitai,” pia ku iya madah.

Abu Seman mantaika penemu nya maya bejaku ba pengerami Ngiling Tikai ba Rumah Mering, Teluk, Batang Igan ditu, hari minggu tu tadi.

Ku iya ti mega Sekretari Politik Kepala Menteri madahka pengawa miring tu pengaya adat asal bansa Iban mai penyelai enggau pengelebih ti ulih narit ati temuai ke datai.

“Sida (temuai) mayuh agi datai ngagai menua kitai laban deka meda adat asal baka tu. Baka nya mega pengawa ngetas ranyai ti nyadika kelaie nutup Gawai maya pengerami ngiling tikai,” ku iya sambil madah pengeraja baka tu enggau naka alah ditan taja pan menua udah jauh berubah sereta jampat mansang.

Ku iya, laban ti nyelaie digaga lalu nadai tauka jarang bisi ba menua bukai, nya alai kebuah pengawa miring diatur nyadi siti batang program Homestay Bawang Assan ke dipandang ngagai temuai ke bisi nemuai ngagai rumah panjai nya.

Maya pengerami tu Abu Seman dipebasa sama ngulu pengawa miring apin bejadika pengerami Ngiling Tikai nya.