Bunyau enggau Mujap dikelala ari cherita kelulu

4

TIGA SEBUAT: Mujap (kanan), Girl Misi (tengah) enggau Bunyau (kiba) pelakun cherita kelulu Iban WaiFM ba konti RTM.

Taja lakun seduai munyi ke tuyu tang bisi pengamat ba pengidup kitai mensia

KUCHING: Cherita kelulu Bunyau enggau Mujap patut nyadika lalau pengidup kitai mensia ninting hari.

“Nyangka bisi mega sekeda orang enda lantang ati ninga kelulu nya tang nya meh ke bendar ditujah pengidup mensia ke enda ulih nyeliahka penyalah tauka pengilap,” ku Harold Ken enggau Stonton James lebuh dikerandau pengarang berita Utusan Borneo.

Cherita kelulu Bunyau enggau Mujap ke suah didinga kitai nengah radio WaiFm Kuching Segulai Sejalai chukup tebilang sereta didinga semua rayat di menua pesisir enggau kandang mengeri.

Lebih 10 cherita kelulu ke dilakonka Harold (Bunyau), Stonton (Mujap) enggau Stephanie Jefrry (Girl Misi) nerima timbal ke chukup manah ari bala peninga Radio Sarawak WaiFM 101.30 ke ngujungka stesyen radio nya chukup dikerinduka mensia mayuh kelebih agi bansa Dayak ke diatu.

Mandang sereta bepelasarka gaya pengidup rumah panjai ke dibai ngagai kandang mengeri, cherita kelulu tu ngembuan mayuh ajar sereta teladan ti tau nyadika pengingat sereta lalau ba pengidup.

“Keterubah iya dipun ba program malam ari tiga ke dikumbai kelab 45, cherita kelulu tu nerima timbal enggau sukung ke manah ari raban WaiFm enggau mensia mayuh.

“Berindik ari nya, kami duai lalu majak ngaga cherita tu ke datai ari runding sereta penemu nitihka gaya orang ke diau ba rumah panjai,” ku Mujap.

“Konsep tu mudah, ngambi pendiau kitai Iban ke diau ba rumah panjai sereta niru gaya jaku sida iya tang jalai cherita ke dipandangka nya nadai nyemetak nyeruru sebarang orang,”tandu iya.

Iya madah, raban pengereja pengawa ba WaiFm udah meri sukung enggau ajar ke pemadu manah ngagai cherita kelulu ke dilakunka sida tiga lalu udah ngangkatka stesyen tu ngembuan mayuh peninga Dayak serata Sarawak.

“Terima kasih ngagai raban WaiFm Iban lebih agi ngagai Laja Sandin, Thomas Tegung, Francis Linggi enggau orang bukai ke udah meri sukung enggau ajar ngagai kami tiga ngemujurka cherita kelulu tu.

“Enda disangka cherita tu nerima timbal ke chukup manah ari bala peninga ke ngujungka kami tiga sebuat dikelala nengah nama Bunyau, Mujap engau Girl Misi,” ku Seduai.

Putus Spring, sakit nyamuk, kereja kontrek ba Singapore, dalam bas, ngitang jalur gemilang, pindah rumah, entukar enda dibayar nya entara lebih 10 cherita kelulu ke chukup dikerinduka bala peninga.

“Kami sebuat gaga ati laban cherita kelulu nerima timbal ke manah lalu mayuh cherita ke baru deka ditabur ba radio dudi ila,” ku Bunyau.

Bunyau enggau Mujap mega madahka bisi perambu deka ngaga cherita kelulu nya nyadi sebengkah TeleMovie kerejasama enggau siti kompeni luar lalu diatu benung ba renggat nulis skrip.

Stonton James tauka Mujap ,28, agi bujang sereta asal penatai ari Sebangki Panjai Lubuk Antu berengkah ba pengawa nengkebang radio ba Rasa FM Sri Aman dalam taun 2009. Dua tahun ba Rasa Fm iya ditukar ngagai WaiFm Kuching ba taun 2011 tu.

Maya ba SMK Simanggang, Mujap sigi rinduka pengawa belakun lalu kala nerima gelar pelakun pemantu pemadu manah ba pekit ke bisi diatur sekula nya.

“Pengerindu aku ba pengawa belakun maya sekula udah mantu aku ngemujurka cherita kelulu tu kelimpah ari tulung sereta ajar orang bukai,” ku Mujap.

Harold Ken tauka Bunyau ,26, agi bujang sereta penatai asal ari Rh Merikan, Banting Sri Aman berengkah ba pengawa nengkebang radio ba Rasa Fm dalam taun 2008 lalu ditukarka ngagai WaiFm Kuching ba taun 2011 mega.

“Peneleba begulai enggau Mujap ba Rasa Fm Sri Aman pengelama dua taun meri pengelantang ngagai kami duai ngemujurka cherita kelulu nya tambah mega gaya leka jaku kami duai ke mayuh agi nemu nunda munyi jaku kitai Iban ba rumah panjai,”ku Bunyau.

Girl Misi kedua bali nama Stephenie Jeffry beumur 25 taun, asal penatai ari Pruan, Lingga Sri Aman madahka diri gaga dibai Bunyau enggau Mujap ba program pandak cherita kelulu nya.

Girl Misi madahka diri nitih skrip ke udah diatur seduai lalu ngenataika pengaga ati iya sepengudah ninga cherita kelulu nya nerima timbal ke chukup manah ari bala peninga Wai FM.

Ba pengujung randau, sida tiga sebuat ngenataika pesan ngagai semua peninga WaiFm nengah jaku “Terus nyukung WaiFm, Terus mendingka WaiFM”