Patut dikerekai enda milih tikas umur, penyampau tubuh, ijinsi sereta NGO
SIBU: Pengawa beberika bantu ngagai sida ti nerima patut dikerekai enda milih tikas umur, penyampau tubuh, ijinsi sereta gerempung ukai dikuasa perintah (NGO).
Chairman Sarakup Indu Dayak Sarawak (SIDS) Pampang Sibu, Ir Alice anak Jawan madahka ulah tu udah bisi dikembuan mensia mayuh menua tu tang diatu ulah nya patut disaguka agi sereta ditanka.
“Tikas runding senentang pemesai reti beberika bantu ngagai pangan diri ti napi penusah mensia mayuh ba menua tu patut dipuji.
“Taja pan baka nya, kitai ngarapka udah tu ila mayuh agi raban enda milih betubuh seiku tauka gerempung majakka ulah lempung jari sereta sinu betatika penusah orang bukai,” pia ku iya madah.
Alice mantaika penemu nya maya berandau enggau pengarang berita sepengudah nyuaka bantu ari SIDS Sibu ngagai Rumah Tonnie Eli ba Tanjung Latap ditu, apin lama tu tadi.
Pemeri nya nyengkaum mata duit, ngepan enggau barang pemakai.
Ku iya nandu baru, bantu ari mensia mayuh besai amat reti ngagai sida ke ditinggang penusah.
“Kitai ke idup begulai anang bisi ati bingking ngagai pangan diri tang lasi ulah ke enda manah nya ngambika ulih besaup enggau pangan diri ngelempung ke tating penusah ti diasaika sida,” ku iya madah.
Rumah panjai Tonnie ditinggang penusah angus urung pukul 3 lemai kena 31 Julai tu tadi ti ngujungka sida serumah semina lekat gari ba punggung aja.
Taja pan baka nya, sida serumah beterima kasih ngagai petara laban nadai penusah bebadi nyadi.
Rumah panjai lapan pintu nya ke baru diseruri taun siti nyin kemari agi mengkang bisi loan RM10,000 sepintu ari baruh Sarawak Housing Commission.
Bela nyempulang Alice maya pengawa tu iya nya Sapit Chairman SIDS Sibu, Monica Giri, Kaban Komiti SIDS Sibu, Sendra Jawang enggau bala raban ke bukai.