KUCHING: Komiti Pemansang enggau Pengelikun Genturung Pendiau (JKKK) Kampung Kudei Baru udah ngatur pengerami Ngiling Bidai apin lama tu tadi.
Pengabang ti pemadu dipebasaka malam nya iya nya Menteri Pengawa Berumah enggau Pemansang Kandang Mengeri Datuk Amar Abang Johari Tun Openg.
JKKK Kpg Kudei Baru dibantu Gerempung Orang Indu Kampung Kudei Baru enggau Platun Rela Kampung Kudei Baru Platun 4/PJ B.
Pengerami ke berangkah jam 7.30 lemai nya diumba enggau Ajat Pengelalu Temuai ke diiring Darling Enli sereta Tabuh Ngajat ari Tim Betabuh ti betuaika Abu Kukin dikena ngepunka pengerami Ngiling Bidai nya.
Nyerumba pengerami malam nya entara pengawa ti diatur baka lagu ke dipelanja, bemukun, makai, pengawa bejual pemakai enggau ai irup dikena ngiga belanja gerempung.
Ba pengerami nya Abang Johari diberi basa nyuaka kad rela ngagai Leftenan Muda Bend Belayung ti ngarika 33 iku kaban rela Platun 4/PJ8 Kampung Kudei Baru.
Pengerami ke dianti mensai mayuh iya nya ngetas sereta ngerebahka ranyai ti diuluka ketuai Tuai Gawai Kertu Chundang.
Berebak enggau tu, nimbal peminta Tuai Rumah Kampung Kudei Baru Sangi Abu, Abang Johari madahka taun baru (2012) sebengkah balai raya deka digaga ngambika bisi dikena mensia mayuh ba kampung Kudei lebih agi raban bansa Iban ti deka ngatur pengawa, tu setipak enggau juluk ati perintah nulung nadai bepilih bansa.
Abang Johari madahka agi mayuh program pemansang diperambu ba mengeri Kuching nyengkaum sitak Satok.
Entara pengabang bukai ke bisi datai iya nya Pegawai Rela Kuching Selatan Leftenan Kol Norsiah Saili; Chairman SADIA Sarawak Dato Anthony Nait enggau bini iya SAO Datin Laceylona Thomas, Penghulu John Tambi, Pemanca Rosli, raban tuai rumah, sereta ke bukai.