Mutar isu rumah jelatung ba danau Bakun, ku Dr Elli

0

BCSC sepenemu enggau MP Hulu Rajang, Datuk Billy Abit sereta nyikap diri besaup ngatur penanggul nya

KUCHING: Komiti Pengelikun enggau Pemansang Raban Bansa Bakun (BCSC) nyukung penemu Kaban Parlimen Hulu Rajang, Datuk Billy Abit Joo ti minta perintah beratika sekeda rumah jelatung ti digaga mensia ba danau tekat ai Bakun.

Chairman BCSC, Dr Elli Luhat madahka pekara tu kala disebut ba aum komiti nya ngelama tu enggau nya komiti ti sigi udah nyendiaka diri mantu perintah tauka opis ti bekuasa bukai mutarka penanggul tu.

Ku iya, komiti nya ngembuan orang ke landik nyaup mutarka penusah tu.

Iya madahka mayuh kaban komiti nya ngembuan pengelandik ba rampa menua, pengawa dagang, luyar enggau pekara menua ti udah nyikap diri meri bantu.

“Bejaku pasal pengelikun ba Projek Tekat Ai Hidroelektrik Bakun iya ukai semina ba danau aja tang iya patut dipeda ari mayuh bengkah pekara.

“Tu nyengkaum pengelikun ba danau, batang ai, darat enggau angin. Nya alai kami deka ngatur forum tauka kereja jurai endur berunding sereta betukar penemu pasal pekara tu,” ku iya lebuh dikerandau nimbal pekara tu kemari.

Ku iya, kereja jurai nya deka diatu ba palan DLT Industries ditu ti deka dipasuk bala orang ari opis ti dikuasa perintah nyengkaum Opis Kampung, Opis Pengeraja Asal enggau Rampa Menua (NREB), Opis Rama Menua (JAS), Opis Pengangkut Darat (JPJ), Komiti Sungai Sarawak (LSS), Opis Pengerai enggau Muzium.

Elli madahka, kereja jurai tu tau nyadika pelasar dikena mutar penanggul pengelikun ba Bakun.

Ku iya, iya ngarapka semua opis ti bekuasa nya datai enggau ngulu kereja jurai tu ila.

Nampung pasal isu rumah jelatung, iya madahka tu mensia mayuh ba menua nya enda nadai betagang nudukka rumah nya.

“Enti nyema pekara tu enda diputar diatu dia iya deka pedis agi diputar dudi ila”, ku iya.

Ku iya, nya alai perintah patut mutarka penanggul tu diatu enggauka iya ngerembai besai agi dudi ila.

Kemari, Billy mansutka pengirau ati meda rumah jelatung ti majak mayuh didudukka orang ba danau nya.

Billy ba penerang nya mega madahka diri udah suah mantaika penanggul tu lalu minta perintah maduka orang ti patut ngemataka danau nya.