Rayat kandang menua pesisir dilalau ngambika ngembuan ati ti sabar nganti pemansang projek
SIBU: Rayat kandang menua pesisir dilalau ngambika ngembuan ati ti sabar nganti pemansang projek diatur ba menua sida laban perintah Barisan Nasional (BN) endang enda kala ngemulaka semaya ti udah kala disebut maya pengawa bepilih besai apin lama tu tadi.
Kaban Kunsil Nengeri (ADUN) Jemoreng, Abu Seman Jahwie madahka, tebal agi projek besai bekenaka ungkus bejuta ringgit lalu meseti dipelin enggau badas apin dipejalai ngambika tau ngenataika penguntung ba timpuh ti lama.
“Nya alai, projek ti deka digaga nya deka lama diperunding apin dipejadika,” pia ku iya madah ngagai bala rayat ba Rumah Gangga Kumbang, Bruan ba pelilih mit Matu ditu, apin lama tu tadi.
Abu Seman datai nemuai ngagai rumah panjai nya ngambi mendingka penanggul ti bisi nuntung bala dia.
Kelimpah ari nya, iya mega bisi nemuai ngagai projek pemansang ti benung digaga ba rumah panjai nya.
Ku iya nandu baru, rumah panjai nya dalam kandang taun 80-an suba sebengkah menua ti kurang pemansang tang diatu sida dia udah bisi jalai alun bekau ari penyabar sida nganti pemansang ari perintah.
“Tu meh kelaie enti kitai bisi ati sabar lalu semampai nyukung pegai perintah BN,” ku iya madahka baru.
Iya ti mega Sekertari Politik Kepala Menteri madah, BN ukai semina bejaku puang baka raban penyakal ti landik nempa jaku liut aja ngagai bala rayat.
“Semaya semina tinggal semaya tang empai ga aku kala meda pemansang ke udah ditumbuhka penyakal ba pelilih mit tu,” pia ku iya nerangka.
Rayat ba Matu, ku Abu Seman, deka ngasai kediri pemujur ari pemansang Projek Kuasa Tau Dikena Baru (SCORE) dalam taun 2030 ila.
Kenu ku iya, ari penumbuh SCORE mayuh awak pengawa puang deka dibuka lebih agi ngagai rayat menua tu empu.
Tang ku iya madah, apai indai meseti ngubah runding sida ngambika chakah agi nyegulaka bala anak ngulihka pemandai nyentukka degree.