PENEMUAI: Mawan nerima penatai raban SDNU ke betuaika Antony Banyan (dua ari kanan) sereta raban iya William langgong (betabi enggau Mawan) enggau Edmund Renggie (kiba).
Progrem nemuai SDNU nengah BDCHS ke Kalimantan nyadika pelasar pemansang entara dua menua
KUCHING: Kelimpah ari ngerapitka kaul ba pengawa rama enggau main asal, penemuai Sarawak Dayak national Union (SDNU) ke Kalimantan Barat nengah program Borneo Dayak Cultural Heritage Safari (BDCHS)patut begiga awak numbuhka pengawa dagang entara dua bengkah menua.
Menteri Pemansang Rama enggau Kandang Mengeri, Tan Sri William Mawan Ikom madahka raban orang dagang ari menua tu patut beambi ulih ari penemuai sida iya begulai enggau SDNU begiga awak dagang enggau timbal sida ari Kalimantan Barat.
“Kaul rama enggau main asal bansa kitai enggau orang ari Kalimantan Barat patut dikerapitka ketegal kitai sama penatai.
“Kelimpah ari nemuai ngerapit kaul, kitai mega patut beambi awak begigaka pengawa dagang begulai enggau timbal diri di menua Kalimantan lalu tu mih ke patut dikemeratka kitai,” ku Mawan.
Iya mansutka jaku tu lebuh nerima penemuai raban ari gerempung SDNU betuaika Sapit Presiden I Anthony Banyan ba opis iya Begunan Baitul Makmur, Petra Jaya ditu, kemari.
Iya madahka orang dagang menua tu enggau ari kalimantan tau teulihka penguntung enti awak tu dikena nengah jalai ke betul seraya kitai ngerapitka kaul rama enggau main asal ke nyau ka sebaka.
Mawan mega madahka opis menteri iya seruran deka mantu program BDCHS ke diatur SDNU lalu ngelalau raban orang dagang patut begulai sama nemuai ngagai Kalimantan.
Lebuhka berandau enggau Mawan, Sapit Presiden I SDNU Anthony Banyan nyadang progrem tu ulih matak mayuh agi orang ke ngarika mayuh macham gerempung ke ukai dikuasa perintah (NGO) begulai sama nemuai ngagai Kalimantan.
Anthony madahka tu mih kali ke tiga SDNU ngatur progrem ke sebaka lalu iya keterubah iya diatur ba taun 2009 lalu kedua ba taun 2010.
“Kitai nyadang ulih matak mayuh agi orang ari gerempung NGO begulai nemuai ba taun tu lalu tu ila nyengkaum raban ari Dewan Adat Dayak Kalimantan.
“Tuju penemuai iya nya deka ngerapitka agi kaul ati bansa dayak entara kedua bengkah menua lalu pia mega ngerembaika agi kaul rama sereta main asal bansa Dayak,” ku iya.
Kelimpah ari nya program tu mega deka numbuhka kaul dagang ke udah diperambu sereta dikemeratka Mawan, ku iya.
Ku Anthony, SDNU deka terus megai tanggung pengawa mantu negapka penyerakup nengah atur ngerapitka kaul rama enggau main asal lalu bepelasarka nya, gerempung tu ngatur program BDCHS ngagai Kalimantan Barat.
Program tu ila disadang diatur kenaka 27 November 2011 nyentukka 4 Disember 2011 berengkah ari bandaraya Kuching nengah pintu penama Tebedu lalu deka nemuai ngagai menua Sanggau, Sintang, Landak, Singkawang lalu rembus ke Pontianak.