NYUAKA CEK PAMPAS: Ding (dua kanan) benung nyuaka cek ngagai seiku penerima caruman PERKESO. Bisi ayan Fenny (kiba), John (2 kiba) enggau Lim (kanan).
SARIKEI: Sepenyampau RM16.8 juta udah dibelanja Gerempung Ngintu Pengelikun Pengawa Rama (PERKESO) Sarawak kena mutarka mayuh macham kes ke nyerangkum kes bebadi industri sepemanjai taun 2010.
Direktor PERKESO Sarawak, John Riba Merin madahka raban pengaji patut bebendar agi meri penerang bekaul enggau nyaga pengelikun ba palan kereja ngambika pemyampau nya ulih dikurangka.
“Ba Sarawak dalam timpuh taun 2010, urung 5,386 kes udah diripot nyengkaum 120 kes mati, 276 kes Ilat enggau kes Penakat,” ku iya.
“Bagi menua Sarikei, urung 145 kes bebadi diripotka ba baruh Skim Bencana Kerja (SBK)enggau 28 kes ba baruh Skim Pinchin Ilat (SPI) udah di terima dalam taun 2010, ba taun 2011 nyentukka ba bulan July mega, PERKESO Sarikei nerima urung 62 kes ba baruh SBK enggau 32 kes ba baruh SPI.
“Bagi SPI nyerangkum bayar bungai kena ngurus bangkai nyentukka 31 Julai 2011 mega, PERKESO Sarikei udah mayar bungai urung RM52,422.59 bagi kes nya,” tandu John baru.
Ku iya, nitihka statistik ba serata menua Malaysia, penyampau bebadi ke bisi diripot ba taun 2010 iya nya 57,639 kes lalu penyampau ke mati iya nya 1,194 kes lalu penyampau ungkup mayar bungai semua iya nya RM1.67 bilion, nyerangkum bayar bungai ba baruh SPI 2010.
John madahka munyi nya ngagai pemberita sepengudah ngulu pengerami nyuaka cek enggau perengka mulaika pengerai ngagai Orang Berinsurans sereta Licha Seranta PERKESO,renggat menua Saraikei ba sebuah hotel ditu, malam ensanus.
Nyerumba enggau pengerami nya, bisi lima iku orang mujur nerima duit pampas ke disuaka Kaban Parlimen (MP)Sarikei Ding Koung Hiing.
John nandu baru, iya ngelalau genap raban pengaji semampai ngerejister nama pekereja sida ba baruh PERKESO ngambika pendiau pengidup enti sema bisi kes bebadi maya gawa ulih diputarka enggau lantang sereta nadai penanggul.
Ku iya, enti pengaji enda ngerejister nama pekereja sida ba baruh Akta Keselamatan Sosial Pekerja (AKSP) 1969 sida ulih diukum RM10,000 tauka dua taun jil tauka kededua ukum nya sekali.
“Penyampau raban pengaji udah ngerejister ba baruh PERKESO Sarikei nyentukka 31 Disember 2010 iya nya urung 1,715, lalu ba taun 2011 nyentukka pun bulan lapan tu tadi, penyampau raban pengaji ke udah ngerejidster urung 1,101.
“Kitai andal ati ba taun tu enggau ke deka datai mayuh agi raban pengaji deka ngerejister ba baruh PERKESO, beduduk ari pemansang ke nyadi ba menua Tanjung Manis sereta menua bukai ke ngelingi iya,” ku iya.
Sama bisi datai ngulu pengerami nya Pengurus PERKESO pampang Sarikei, Fenny Lim enggau Lim Hock Meng ke ngarika Pemesai Pelilih menua Sarikei.