TEPA UNGKUP NUAN: Jabu (dua kanan) nerima tepa ari Mawan (dua kiba) pengudah iya ti nerima resolusi FJI ari Edmund (kiba), bela dikemata Chairman Pengatur FJI Edwin Jemat. — Gambar Chimon Upon
KUCHING: Pesaka jaku kitai Iban tetap enda lesap tang seruran tan bejeman enti dijaga, dikemeran sereta dikemeratka bansa Iban empu.
Sapit Kepala Menteri Datuk Patinggi Tan Sri Alfred Jabu Numpang madahka kitai bansa Iban patut beajar sereta meransang pangan diri nyaga, ngibun, namu, nengkani lalu nyaguka jaku Iban enggaika identiti bansa kitai pupus enggau enda dikelala rebak dudi.
“Jaku kitai Iban nya sebengkah pesaka besai ti enda tau enda dijaga kitai Iban enggau naka pemanah,” ku Jabu.
Iya bejaku ba pengawa ngerami penembu Forum Jaku Iban 2011 ti diatur Menteri Pemansang Rama enggau Kandang Nengeri (KPSU) begulai enggau Utusan Borneo ba Four Points By Sherton ditu lemai kemari.
Nambahka nya, Jabu madahka pengeran raban ari Majlis Adat Istiadat enggau Dayak Culture Foundation ngangkatka sereta nyalin baru rikod tape asal bagi Iban RTM ulih disimpan nyadi pesaka lalu ke chuan rebak baru.
Iya madahka rikod ti disalin nya kena nambahka pesaka ti digumpul sereta disimpan ba Libarary Resources Material Adat Iban.
“Pesaka ti disimpan tu ulih nyadi perengka chuan dikena Iban Scholars kemaya hari tu enggau jemah ila,” ku iya.
Bejaku baru, Jabu madahka jaku Iban ukai ditemu sereta dikelala diatu, tang endang udah bisi ari kelia lalu dikerembai nyentukka diatu.
Iya madahka niang Dunging Gunggu seiku bansa Iban ti nengkebang urup Iban
Niang Dunging Gunggu tu kelia nengkebang 77 igi leka urup ti keterubah, ke digumpul entara taun 1947 ngagai 1962.
Berindik ari deka nyaguka Urup Iban Dunging, Jabu ngagihka belanja RM10,000 ngagai Assoc Prof Dr Bromeley Philip, Universiti Teknologi Mara Sarawak (UiTM) kena nyendia sereta ngeluarka bup Urup Iban Dunging.
Kelimpah ari nya iya madahka ba sekula mega jaku Iban ulih sebaris enggau jaku Mandarin enggau Tamil, ke nyadi sebagi ari subjek ti dipelajar bansa Iban sereta tau dipelajarka bansa bukai.
Pelajar jaku Iban ku iya majak dikerindu mensia mayuh nyentukka nyadi sebengkah subjek ba Institusi Pelajar Tinggi baka Universiti pendididkan Sultan Idris (UPSI) sereta Palan Pematih Pengajar.
Berebak enggau tu, kena nyaga, ngintu, ngerembai, ngemansangka sereta ngetanka jaku Iban, Majlis Adat Istiadat diberi tanah 15 ekar pemesai ba Samarahan.
Ari tu ila ku iya Majlis Adat Istiadat ulih nyelak sereta ngeluarka mayuh bup asil ari pansik ke tau nyadika chuan rebak baru diatu enggau jemah ila, nyengkaum ulih dikena ba tikas sekula enggau pelajar tinggi.