AMBROSE BADI
SONG: Ketuai Angkatan Muda Keadilan (AMK) Pampang Kapit, Ambrose Badi ke mega Mandal Ketuai AMK Sarawak madahka diri nyukung bala Ketuai Parti Keadilan Rakyat (PKR) enggau pengabis ati.
“Majoriti kaban PKR, ba Kapit enda besetuju enggau sebarang penerang ti dipansutka Ketuai Pampang PKR, Munan Laja ti nitihka singkang raban Jimmy Donald pansut ari parti nya apin lama ke udah .
“Kami kaban PKR ditu seruran nyukung penuh PKR, sereta bediri teguh ba belakang Datuk Seri Anwar Ibrahim ngambika ulih bejaku sereta ngintu nasit rayat,” ku iya.
Ba penerang ti dipansutka ensanus, Ambrose madahka ulah Munan ti mansutka diri ari parti nya bepanggai ba iya empu.
“Kami bebasaka pemutus iya ti mansutka diri ari parti. Sida ulih ngaga pemutus kediri tang kitai nadai kaul enggau sebarang pemutus iya.
“Kami manggaika pekara tu ngagai bala ketuai PKR Sarawak, Baru Bian ngaga pemutus bekaul enggau penuduk puang Ketuai Pampang PKR Kapit.
“Kami bis bendar pengarap ati Komiti Ketuai Menua (MPN) ngembuan chara ke pemadu manah kena mutarka pekara tu lalu kami deka nyukung sebarang pemutus ti digaga raban MPN,” ku iya.
Ku Ambrose, rayat nemu beratika pekara ti nyadi ba politik ke baka tu. Pekara tu mega nadai nanggul sukung rayat ngagai PKR, ku iya.
“Taja pia, aku arapka MPN ulih ngemanyuhka agi progrem sereta chakah agi nempa pengarap ati rayat ngagai PKR,” ku iya.