Wednesday, April 14

PMR: SM Sains Miri ngarap nyapai juluk

0

MIRI: Sekula Sekondari (SM) Sains Miri (SAINSri) nagit bala nembiak ke ngambi peresa Peperiksaan Menengah Rendah (PMR) teulihka 10 persin nambah sereta bulih gred A ba semua sabjek taun tu.

Prinsipal sekula nya, Serina Sauni ngarapka bala nembiak ulih nyapai tagit 80 persin enti dibandingka enggau pemutus ti dijapai taun siti nyin kemari iya nya 71.88 persin.

“Kami udah berengkah kenyau nembiak nya agi ba pom dua lalu pemanah pemutus sida serunyut baka nya belama nyentukka datai ba hari ke bendar peresa (PMR),” ku iya lebuh ti berandau enggau pengarang berita ari Utusan Borneo pagi ensanus.

Ku iya, bala nembiak ke ngambi peresa nya di intu sida enggau manah sereta diberi penerang ke penudi endar ti dikumbai sida Peransang ke Penudi ngelama sejam maya hari peresa nya.

“Tuju nya ngambika bala nembiak enda berasai kesal ati lebuh ngambi peresa,” ku iya.

Nandu nya baru ku iya, pemujur ti dijapai SAINSri bepanggai penuh ba sukung Gerempung Apai Indai enggau Pengajar (PIBG) sekula nya.

“Sebedau anak sida ngambi peresa, kami bisi meda apai indai nembiak sekalika ari jauh tauka semak datai ngagai sekula nya meri peransang ngagai anak sida ,” ku iya.

Ba peresa PMR taun siti nyin kemari, SAINSri udah nyapai Gred Purata Sabjek (GPS) ke pemadu tinggi ba Sarawak iya nya 1.099 lalu penyampau nembiak ti teullihka Gred A ba semua sabjek nambah 11 persin.

Berindik ari nya, SAINSri udah nerima Anugerah Sekula Beprestasi Tinggi enggau Anugerah Bai’ ah ari Opis Menteri Pelajar Malaysia.

Ensanus, seraban 98 iku nembiak pom tiga ba SAINSri enggau ngambi peresa PMR.