MIRI: Mayuh agi nembiak ari raban bansa Dayak kelebih agi Iban dipinta nyadi soldadu laban penyampau sida kurang amat diatu, iya nya semina lima nyentukka tujuh persin ari semua penyampau raban soldadu ba serata menua Malaysia.
Panglima 9 Briged, Brigedier Jeneral Datuk Stephen Mundaw madahka, enti sida enggai nyadi soldadu tetap, sida tau nyadi soldadu Wataniah (AW).
Ku iya, enti sida enggau AW, sida ulih gawa nyambil nyadi soldadu, laban AW mega beguna sereta nyadi lapis kedua beguna dikena ngetanka pengelikun menua.
“Enti enda ulih gawa nyadi soldadu tetap,lalau aku pemadu nadai pan sida nyadi AW laban nya nyendiaka servis enggau chara nyambil ba bidang soldadu,” ku iya.
Nya alai, iya bebendar amat meransang bala nembiak lebih agi ari raban bansa Iban Dayak nyadi AW, laban nya sebengkah ari opsyen ngamb ika sida ulih gawa ba bidang soldadu.
“Diatu, raban bansa Iban semina bisi lima nyentukka tujuh persin ari semua penyampau raban soldadu ba sereta menua Malaysia. Kelimpah ari nya, raban bansa Dayak ari Sabah enggau Sarawak enti dipegulaika semina bisi 30 persin ari penyampau nya,” ku iya.
Stephen bejaku munyi nya lebuh ti berandau enggau pengarang berita ari Utusan Borneo ba pengerami Regata Baram Marudi 2011 tu tadi.
Ku iya, mayuh agi peluang ngagai mensia mayuh ti deka nyadi AW laban sida bisi pampang ba sekeda endur bukai nyengkaum Kapit enggau Mukah, tambah mega Rejimen 510AW bepalan ba Sibu lalu 511AW ba Kuching.
“Kami mega bisi ngerekrut bala pengarang berita ngambika tau nyadi sebagi ari operasi media kami lalu pengawa sida sebaka enggau ke diatu, sereta deka dianjung ngulihka berita ngagai menua tasik baka ba Lubnan,” ku iya.