Pengerami Ngintu Hari Pengada Ketujuh PRS, malam tu: Entulu

0

SIBU: Urung 2,000 Kaban Parlimen, Kaban Kunsil Nengeri, Kaban Majlis Tertinggi, Komiti Indu enggau Lelaki pusat sereta 33 ketuai pampang Parti Rayat Sarawak (PRS) datai ngulu pengerami hari pengada ketujuh PRS, malam tu.

Chairman Pengatur Pengerami Datuk Joseph Entulu Belaun madahka, bisi 215 mija udah dibeli beserimbai enggau pengerami ti diatur ba Hotel Kingwood.

“Pengerami tu deka dipenyadika Presiden Parti Tan Sri James Masing,” ku iya madah ba penerang media ke diterima demalam.

Ku iya, pengawa nyambut hari pengada nya disempulang pengawa belagu ari semilan iku artis menua tu sereta pengawa mandangka pekayan bansa Dayak ari Roses Hair & Beauty Saloon.

“Antara artis ke bisi datai merindang ba pengerami nya iya nya Andrewson Ngalai, Ricky Andrewson, Richmond Alan Morshidi, Lucy M, Dom Romeo, Urai, Angela Lata Jua, Andrew Lanting enggau Johnny Aman,” ku iya ke nyadi Sapit Presiden PRS.

Nyerumba enggau nya, raban pengatur pengawa ngarapka kaban enggau penyukung parti ulih datai tumu ngambika ampit meda pengawa beperindang.

Kaban Parlimen Selangau nya, madahka pengerami nyambut hari pengada nya diatur kelai pengawa keterubah parti nya napi pengawa bepilih besai (PRU) ti deka diatur dusd ila.