BISI ENDUR KEDIRI: Fatimah (tengah) benung berandau enggau pemberita sepengudah tembu konvensyen nya kemari. Sama bisi dipeda Pengerusi Yayasan Clifford Beer Wee Hong Seng (kiba) enggau sida ke bukai.
Orang ti napi penanggul nya begunaka perengka, alai diau, pemakai sereta intu ti setipak enggau penusah ke ditapi sida, ku Fatimah
KUCHING: Sarawak patut bisi disediaka sebengkah palan ti endang diungkupkka ngagai orang ti bisi napi penanggul ba pengerai runding.
Menteri Pengintu Pengelantang Mensia Mayuh, Orang Indu enggau Pemansang Ruang Bilik, Datuk Fatimah Abdullah madahka orang ti napi penanggul nya begunaka perengka, alai diau, pemakai sereta intu ti setipak enggau penusah ke ditapi sida.
Naka ke diatu ku iya, orang ti bisi penanggul ba pengerai runding tu bekunsi enggau palan pengintu pengelantang orang tuai Sri Kenangan ba Kuching enggau Sibu.
Taja pia ku iya, palan nya enda tentu ipak ngagai orang ti bisi penanggul ba runding, berindik ari perengka ti disediaka ba palan (Sri Kenangan) ungkup orang ti nadai napi penusah nya.
Nitihku penerang Fatimah, ba Rumah Sri Kenangan Kuching, 14 ari 80 iku orang tuai ke diau ba rumah nya napi penanggul pengerai runding baka charut tauka selebubu runding, lalu tujuh ari 14 iku nya dah datai ba tikas ti kelalu udu.
Ba Rumah Sri Kenangan Sibu, 12 ari 81 iku orang tuai ke diau ba palan nya ngembuan penanggul ba runding.
“Sarawak begunaka sebengkah palan ti diungkupka ngagai orang ke napi penanggul ba pengerai runding. Lalu palan nya patut ngemeratka pengerai enggau pengintu pengelantang sereta nyendiaka perengka ti setipak.
“Ba Rumah Sri Kenangan Kuching bisi 14 iku ke napi penanggul pengerai runding, lalu ari penyampau nya semilan iku lelaki enggau lima iku indu.
“Dua belas iku orang (lima indu enggau tujuh lelaki) ti napi penanggul ba pengerai runding diau ba Rumah Sri Kenangan Sibu,” ku Fatimah dalam aum pengarang berita ditu, lemai kemari.
Kelimpah ari ti nadai palan nya, Sarawak mega betapi enggau pengereja pengawa ba pekara tu, taja pan diatu raban psychiatrist bisi datai meresa orang sakit nya (penanggul runding) sebulan sekali.
“Kitai begunaka pengereja pengawa ti dilatih kena napi orang ti bisi penanggul ba pengerai runding di menua tu.
“Ke siku psychiatrist patut nyaga 15 iku orang ti bisi penanggul ba runding,” ku Fatimah madahka penanggul ba pengerai runding ukai dibaruh opis menteri pengintu pengelantang.
Lebuh ditanya bekaul enggau chara kena nyeliahka penanggul nya nyadi, iya madahka, ulah penyayau sereta ngembuan tanggung pengawa ngagai orang tuai patut dikemeratka tiap iku orang.
Ngenang ‘The First International Conference on the Promotionof Mental health and Wllbeing’, Fatimah madahka konvensyen nya deka diatur kena 28 ngagai 30 Mac 2012.
Konvensyen ti ngena rambai jaku ‘Enough is Enough! The New Approach to Mental Health’ dipelabaka diatur ba Hotel Pullman.
Tuju konvensyen nya kena muka runding enggau meri penemu ngagai mensia mayuh pasal pengerai runding.