NYEMILIK BARU: Salang (dua kanan) nyuaka setipikit ngaga raban Progrem Nyemilik Rumah Nyuka seraya diperati Ik Pahon (kanan) enggau bala kebukai.
Keterubah ba Sarikei, disempulang 13 iku raban ti ngembuan 45 pintu bilik
SIBU: Progrem Nyemilik ba Rumah Nyuka Itam, Ulu Sarikei nyadi sebengkah endur baru ba industri dagang temuai menua tu. Progrem tu disempulang 13 iku raban iya ke mega progrem Nyemilik keterubah ba Sarikei.
Pengawa nyuaka setipikit ngagai raban masuk ba progrem tu dipejadika Sapit Menteri Pemadah, Penyambung enggau Pengeraja Asal, Datuk Joseph Salang Gandum.
Nitihka dipadah Chairman Progrem Nyemilik Rumah Nyuka, Kaunselor Ikau Aji, bisi 1,335 iku temuai ari serata menua udah datai ngagai rumah nya.
“Tu nyengkaum temuai iya ke enggau belayar ba Batang Rajang nepan RV Orient Pandaw. Apin lama tu tadi kitai nerima mayuh penatai temuai dibai ijin-ijin temuai,” pia ku iya madah ngagai pengarang berita sepengudah pengerami nerima setipikit, apin lama tu tadi.
Rumah panjai Lubuk Lemba tu dientak ba taun 1955, urung 17 kilometer ari simpang Jalai Bayong lalu urung 85 KM ari mengeri Sibu.
Rumah panjai tu bisi 45 pintu lalu ngembuan 300 iku nembiak.
“Kami benasit bendar laban dipilih Opis Menteri Dagang Temuai ngulu latih sebedau dirijista alai bejalaika Progrem Nyemilik keterubah ba Sarikei.
“Kami mega ngemeratka nama pekara dipelajar maya ngulu latih progrem nyemilik tu,” ku iya nerangka.
Kelimpah ari meda rumah panjai ti agi mengkang ngena chara lama suba, ditu bala temuai mega tau ngelawa wong Sungai Pau enggau Sungai Munsoh.
Ku Ikau enti deka meda wong tu temuai ulih bedarat (bejalai kaki) ari rumah panjai nya.
“Temuai mega diberi awak manduk bansa pemakai sida empu baka pansuh, paku keru, tubu enggau mayuh pemakai kampung ke bukai,” ku iya.
Enggau tu iya ngarapka sida semampai nerima sukung ari opis menteri bekaul kelebih agi nerima bantu nyeruri perengkaguna mensia mayuh ba menua sida.
“Sepengudah mendingka jaku tadi, kitai deka bejalaika pengawa enggau badas ngambika ulih narit mayuh agi temuai ari luar ti enda semina datai meda rumah panjai aja tang kami mega deka mantai pengawa tauka chara adat melah pinang Iban kelimpah ari nguji ngena ngepan bansa Iban.
“Kami pechaya progrem baka tu meri pengingat enggau kenang ngagai barang sapa datai nemuai kitu lalu nyadung berita ngagai menua sida,” pia ku Ikau nandu baru.
Ba pengerami nya mega, iya nyuaka 30 iti peminta baru enggau Progrem Nyemilik ngagai Sekretari Mendam Opis Menteri Dagang Temuai Sarawak, Datu Ik Pahon Joyik.