Tanggung pengawa SDNU majak berat

0

Ba sesebengkah endur bansa Dayak seruran nambah, begunaka bantu ari serakup: Mong

SIBU: Apin lama tu tadi Gerempung Dayak Sarawak (SDNU) pati Sibu Jaya nerima pemeri sepenyampau RM7,000 ari Menteri Muda Betanam Betupi (Pemansang enggau Dagang) Datuk Mong Dagang.

Pemeri nya disua ngagai Chairman SDNU Sibu Jaya Steven Rom ba sebengkah pengerami ti diatur ba resturan tebilang ditu.

Mong maya ke bejaku ngarapka pemeri nya ulih diatur enggau badas lebih agi kena ngerembaika tanggung pengawa SDNU ngagai rayat.

“Kemaya hari tu, tanggung pengawa SDNU ngagai mensia mayuh majak berat, kelebih agi rayat bansa Dayak baka ba Sibu Jaya ditu nyau majak nambah ninting taun.

“Nambahka nya, ukai semua sida (Dayak) natam ba mengeri ke bepemisi magang nya SDNU meh alai sida bepanggai,” ku iya madah.

Ba pengerami nya mega, Steven madahka ngagai bala mayuh nyentukka diatu SDNU Sibu Jaya bisi ngembuan lebih kurang 700 iku raban.

Penyampau nya kenu ku iya enda disengkaum enggau pom ke bedau dipeda silik.

“Kitai deka bebendar nambahka penyampau raban ngambika kitai lantang agi bejalaika atur pengawa SDNU ngagai mensia mayuh,” pia ku iya.

Naka ke diatu, SDNU Sibu Jaya udah nyendiaka perengkaguna ngagai mensia mayuh baka mija, bangku, pingai mangkuk enggau khemah lalu semua nya dikena maya bisi ngatur pengerami tauka enti bisi rabat ba menua nya.