Mensia ke mekuh jalai pengarap lantang seput meda penembu Gerija Saint Luke

0

BEREKAT: Datuk Bolly sepenyangkai ba mua gerija dikelalu raban paderi ke bukai ba pengawa merekat palan sembiang ke baru nya.

SRI AMAN: Raban mensia ke mekuh jalai pengarap kristian Anglikan ba Pelilih Sri Aman ulih lantang agi narit seput sepenembu Gerija Saint Luke ke baru nya.

Gerija ke berega RM2.4 juta nya mujur dipenyadi sereta diberekat Ketuai Bishop Kuching (Sarawak enggau Brunei) Right Reverend Datuk Bolly Lapok empai lama tu tadi.

Ba pengawa nya, Bolly ke disempulang Ketuai Gerija St Luke Sri Aman, Venerable Archdeacon Chimbie Bunsie berengkah nekung penama gerija nya tiga kali sebedau masuk sereta besembiang merekat gerija baru nya.

Berebak enggau nya, Ketuai Bishop ngepunka kelai Alpha enggau Omega ba tepung ke disediaka enda jauh ari mua pintu gerija nya sebedau mansang ngagai Altar ke bela disempulang paderi bukai sereta pemantu Gerija  St Luke nya.

Urung 800 iku raban kristian ari gerija Anglikan bisi ngulu pengerami ke chukup ngelantangka ati bela besaup besembiang ngambika diberekat  sereta ba pengujung atur pengawa dia Bolly nyain plak ke tanda gerija baru nya dipenyadi.

Gerija St Luke Sri Aman ke baru nya mujur digaga ari bantu perintah nengeri, gerempung ukai dikuasa perintah (NGOs) sereta sekeda mensia ke bisi penyinu ke jalai pengarap kristian.

Gerija ke berengkah digaga kena 12 April 2010 suba lalu tembu pengujung bulan November tu tadi.

Gerija ke baru tu, nganti ke lama ti rusak empa api kena 15 Disember taun 2002 suba.

Gamal baru gerija nya, senipak enggau sejarah Sri Aman ke ngukir nama nyadi bandar ke moden.